Sænski línumaðurinn Max Darj mun yfirgefa Füchse Berlin eftir yfirstandandi tímabil. Félagið hefur ákveðið að framlengja ekki samning fyrirliðans og mun heldur ekki nýta sér ákvæði um eins árs framlengingu. Ákvörðunin er liður í breytingum á leikmannahópi þýsku meistaranna frá 2025.

Darj gekk til liðs við Füchse Berlin frá Bergischer HC árið 2022 og hefur átt stóran þátt í velgengni félagsins undanfarin ár.

Hann varð þýskur meistari með liðinu á síðasta tímabili og lyfti meistaratitlinum ásamt Paul Drux, fyrrverandi fyrirliða félagsins. Þetta var fyrsti þýski meistaratitillinn í sögu Füchse Berlin.

Í apríl á þessu ári bætti Darj síðan þýska bikarmeistaratitlinum í safnið.

Darj var kjörinn fyrirliði Füchse Berlin af samherjum sínum fyrir tímabilið 2024/25 og tók þá við hlutverkinu af Paul Drux, sem hafði þurft að leggja skóna á hilluna vegna meiðsla.

Hinn 35 ára gamli Svíi er nú á sínu fimmta tímabili hjá félaginu og hefur skorað 146 mörk í þýsku Bundesligunni. Hans helsta hlutverk hefur þó verið í varnarleik liðsins.

Bæði Darj og Mijailo Marsenic munu yfirgefa Füchse Berlin eftir tímabilið 2026/27.

Félagið hefur þegar tryggt sér þrjá nýja leikmenn fyrir næsta tímabil, þá Dika Mem, Simon Pytlick og Theo Monar.

Bob Hanning, framkvæmdastjóri Füchse Berlin, þakkar Darj fyrir framlag hans til félagsins.

„Við höfum átt frábær ár með Max og fagnað stórkostlegum árangri. Frá því hann tók við af Paul Drux hefur hann verið og er enn frábær fyrirliði. Við eigum enn mikið fram undan saman og erum spennt að sjá í hvaða búningi hann verður á næsta tímabili,“ sagði Hanning.

Darj sjálfur segist þakklátur fyrir árin í Berlín.

„Ég er mjög þakklátur fyrir árin sem ég hef átt hér. Ég er stoltur af því sem við höfum áorkað sem lið og félag undanfarin tímabil. Við eigum enn mikið eftir að gera og ég horfi bjartsýnn fram á það sem eftir er af tímabilinu,“ sagði Darj.

Nicolej Krickau, þjálfari Füchse Berlin, fór einnig fögrum orðum um sænska fyrirliðann og það hlutverk sem hann hefur gegnt hjá félaginu.

„Max skiptir mig ótrúlega miklu máli og hann var algjör lykilmaður í því að hjálpa mér að aðlagast hér. Hann stóð sig frábærlega og ég er honum sérstaklega þakklátur fyrir það,“ sagði Krickau.

Danski þjálfarinn vonast til þess að Darj finni góða lausn fyrir sig og eiginkonu sína, Amöndu.

„Ég vona innilega að Max finni góða lausn fyrir sig og eiginkonu sína Amöndu. Við erum ekki bara að kveðja leikmann heldur líka einstaka manneskju,“ sagði Krickau.