Tveir leikmenn íslenska kvennalandsliðsins fá að upplifa sitt fyrsta stórmót með A-landsliðinu á Evrópumótinu í desember. Það eru Sonja Lind Sigsteinsdóttir, leikmaður Hauka, og Sara Dögg Hjaltadóttir, leikmaður ÍR.

Þær eru báðar í 17 manna hópi sem Arnar Pétursson landsliðsþjálfari kynnti á blaðamannafundi HSÍ og eru einu leikmenn hópsins sem hafa ekki áður farið á stórmót með A-landsliðinu. Fram undan eru því ný og spennandi verkefni fyrir þær þegar þær stíga á stærsta svið evrópsks landsliðshandbolta.

Sonja Lind og Sara Dögg eru jafnframt á meðal níu leikmanna EM-hópsins sem leika hér á landi en átta leikmenn hópsins leika með erlendum félagsliðum.

Á meðan þær stöllur búa sig undir sitt fyrsta stórmót er Arnar á leið á sitt fjórða stórmót sem þjálfari íslenska landsliðsins. Hann tók við liðinu í ágúst 2019.

Ísland leikur í A-riðli í Oradea í Rúmeníu og hefur keppni gegn Slóveníu fimmtudaginn 3. desember klukkan 16:30. Tveimur dögum síðar mætir liðið Svartfjallalandi á sama tíma áður en riðlakeppninni lýkur með leik gegn Ungverjalandi mánudaginn 7. desember klukkan 19:00. Allir leiktímar eru á íslenskum tíma.