Slóvenski handboltamaðurinn Aljuš Anžic hefur heldur betur vakið athygli í Meistaradeild Evrópu á tímabilinu en þessi átján ára gamli leikstjórnandi RK Celje hefur verið einn afkastamesti leikmaður keppninnar þrátt fyrir ungan aldur.

Anžic fór á kostum í síðasta leik Celje í riðlakeppni Meistaradeildarinnar á miðvikudaginn þegar liðið tapaði fyrir Zagreb, 32-38, á heimavelli. Hinn átján ára gamli Slóveni skoraði tíu mörk og gaf tíu stoðsendingar í leiknum og átti þannig beinan þátt í tuttugu af 32 mörkum Celje.

Hann hefur verið nánast óstöðvandi í Meistaradeildinni í haust. Anžic skoraði alls 47 mörk í sex leikjum Celje í riðlakeppninni og gaf auk þess 29 stoðsendingar. Það gerir 7,8 mörk og 4,8 stoðsendingar að meðaltali í leik, eða tæplega þrettán mörk og stoðsendingar samanlagt.

Hann var þriðji markahæsti leikmaður riðlakeppninnar þrátt fyrir að Celje hafi tapað öllum sex leikjum sínum.

Anžic byrjaði keppnina af miklum krafti og skoraði ellefu mörk gegn Zagreb í fyrstu umferðinni. Hann skoraði síðan níu mörk í báðum leikjunum gegn PSG áður en hann lauk riðlakeppninni með tíu mörkum gegn Zagreb.

Frammistaða Anžic hefur ekki farið fram hjá stærstu félögum Evrópu. Samkvæmt spænska handboltamiðlinum MiBalonmano reyndi Barcelona að fá hinn unga Slóvena til liðs við sig á síðasta ári.

Anžic ákvað hins vegar að vera áfram hjá Celje og framlengdi samning sinn við félagið til sumarsins 2028. Nú er hann meðal annars orðaður við ungverska stórliðið Pick Szeged, sem er sagt fylgjast grannt með stöðu hans.

Anžic, sem er fæddur í febrúar árið 2008, er 188 sentímetrar á hæð og leikur sem leikstjórnandi. Þrátt fyrir ungan aldur hefur hann þegar tekið að sér stórt hlutverk hjá Celje og sýnt að hann getur staðið í fremstu röð gegn bestu félagsliðum Evrópu.