Ísland tekur á móti Úkraínu í Laugardalshöll í kvöld í fyrsta leik sínum í undankeppni EM 2028. Flautað verður til leiks klukkan 19:30 og uppselt er í Höllina.

Úkraínumenn hafa tapað fjórum af þeim fimm landsleikjum sem þeir hafa leikið á árinu. Eini sigurinn kom gegn Slóvakíu á útivelli í mars, 32-31.

Úkraína tapaði öllum þremur leikjum sínum á Evrópumótinu í janúar. Liðið laut í lægra haldi fyrir Noregi, 39-22, Frakklandi, 46-26, og Tékklandi, 38-29. Samanlagður markamunur í leikjunum þremur var því mínus 46.

Í mars mættu Úkraínumenn Slóvakíu tvívegis. Þeir töpuðu fyrri leiknum, 24-27, en svöruðu með eins marks útisigri fjórum dögum síðar.

Úrslit Úkraínu á árinu:

15. janúar: Noregur – Úkraína 39-22
17. janúar: Úkraína – Frakkland 26-46
19. janúar: Tékkland – Úkraína 38-29
18. mars: Úkraína – Slóvakía 24-27
22. mars: Slóvakía – Úkraína 31-32