Áhyggjur eru hjá spænska stórliðinu Barcelona eftir að franska stórstjarnan Dika Mem þurfti að yfirgefa völlinn vegna meiðsla í 34–18 sigri liðsins gegn Caserío Ciudad Real í spænsku úrvalsdeildinni á þriðjudagskvöldið.

Mem, sem er einn mikilvægasti leikmaður Barcelona og franska landsliðsins, varð fyrir höggi á vinstri höndina í viðureign við Nacho Plaza, línumann Ciudad Real. Höggið kom á einn fingur vinstri handar, sem er skothönd Frakkans, og reyndust óþægindin það mikil að hann gat ekki haldið leik áfram.

Frakkinn yfirgaf því völlinn og kom ekkert meira við sögu í leiknum. Þrátt fyrir það átti Barcelona ekki í vandræðum með að tryggja sér öruggan sigur en óvissan um meiðsli Mem skyggði á úrslitin.

Enn liggur ekki fyrir hversu alvarleg meiðslin eru. Félagið hefur ekkert gefið út um meiðslin eða áætlað hvenær leikmaðurinn geti snúið aftur. Frekari læknisskoðanir eiga að leiða í ljós hvort um sé að ræða minniháttar högg eða meiðsli sem gætu haldið honum frá keppni um einhvern tíma.