Kvennalið Selfoss hefur komið mörgum á óvart með frammistöðu sinni í Olís-deild kvenna á tímabilinu. Selfyssingar hafa þegar náð í fleiri stig en allt síðasta tímabil þrátt fyrir að hafa undirbúið sig fyrir keppni í næstefstu deild fram á síðustu daga ágústmánaðar.

Selfoss vann góðan fjögurra marka sigur á KA/Þór, 26–22 í 8. umferð Olís-deildarinnar um síðustu helgi og er nú í sjötta sæti deildarinnar með sjö stig eftir átta leiki. Liðið hefur unnið þrjá leiki, gert eitt jafntefli og tapað fjórum leikjum.

Árangurinn er sérstaklega athyglisverður í ljósi þess að Selfoss hafnaði í neðsta sæti Olís-deildarinnar á síðustu leiktíð með aðeins sex stig eftir 21 leik. Liðið átti því að falla niður í Grill 66-deildina og hóf undirbúning sumarsins með það í huga að leika þar í vetur.

Það breyttist hins vegar með óvæntum hætti þann 27. ágúst síðastliðinn þegar Víkingur ákvað að draga lið sitt úr Olís-deildinni, aðeins níu dögum áður en keppni átti að hefjast. Eva Hrund Harðardóttir hafði þá óskað eftir því að hætta sem þjálfari Víkings eftir aðeins þriggja mánaða starf og hafði félagið glímt við erfiðleika í undirbúningnum.

Selfossi var í kjölfarið boðið að taka sæti Víkings í efstu deild. Eftir samráð við leikmenn og þjálfara ákvað félagið að þiggja boðið og fékk því aðeins rúma viku til að undirbúa sig fyrir allt annað verkefni en upphaflega hafði verið stefnt að.

Þrátt fyrir þessar óvenjulegu aðstæður hefur Selfoss farið vel af stað. Liðið gerði sér lítið fyrir og vann Íslandsmeistara Vals í fyrstu umferðinni og hefur síðan bætt við sigrum gegn HK og KA/Þór auk jafnteflis gegn ÍR. Selfyssingar hafa nú fengið stig úr þremur leikjum í röð.

Í sigrinum gegn KA/Þór um helgina var Hulda Hrönn Bragadóttir markahæst með sjö mörk og Perla Ruth Albertsdóttir skoraði sex. Selma Þóra Jóhannsdóttir átti jafnframt stórleik í marki Selfoss og varði sextán skot, eða 42% þeirra skota sem hún fékk á sig.

Rætt var um frábæra byrjun Selfoss og sigurinn gegn KA/Þór í nýjasta uppgjörsþætti Handkastsins. Árangur liðsins vekur ekki síst athygli vegna þess hversu skammur undirbúningstíminn fyrir Olís-deildina var.

Selfoss fær botnlið Stjörnunnar í heimsókn á föstudaginn í 9. umferð Olís-deildarinnar. Hefst sá leikur klukkan 20:15. Stjarnan hefur aðeins fengið tvö stig í fyrstu átta leikjum sínum.

Fyrir tímabilið hefði líklega fáum dottið í hug að Selfoss yrði komið með fleiri stig eftir átta umferðir en liðið fékk á öllu síðasta tímabili.