Það gæti farið svo að tímabilið hjá Halli Arason leikmanni Aftureldingar væri lokið. Þetta staðfesti Stefán Árnason þjálfari Aftureldingar í viðtali við Handkastið eftir sigur liðsins gegn HK í 2.umferð Olís-deildarinnar í gærkvöldi.

Hallur hefur ekki verið í leikmannahópi Aftureldingar í fyrstu tveimur leikjum tímabilsins en Hallur fór úr axlarlið á undirbúningstímabilinu, í annað sinn á þessu ári.

,,Tímabilið hans er í mikilli óvissu og hann er að fara í nánari skoðun. Það lítur allt út fyrir það að hann sé á leiðinni í aðgerð sem þýðir að hann verði ekkert meira með á tímabilinu," sagði Stefán sem viðurkenndi að hann væri ekki læknisfræðilega menntaður og gæti ekki staðfest endanlega hvenær hann gæti spilað á nýjan leik eftir aðgerð.

Um gríðarlegt áfall er um að ræða fyrir Aftureldingu en Ævar Smári Gunnarsson ungur og efnilegur leikmaður Aftureldingar hefur leyst hægri skyttu stöðuna í fyrstu tveimur leikjum liðsins.

,,Síðan erum við með Árna Braga sem getur líka spilað í hægri skyttunni svo við leysum þetta alltaf,” sagði Stefán.