Aron Rafn Eðvarðsson markvörður Hauka var ekki í leikmannahópi liðsins í tíu marka sigri gegn ÍBV í lokaleik 6.umferðar Olís-deildar karla á sunnudaginn. 

Haukar unnu leikinn 39-29 og eru jafnir Aftureldingu í 1. og 2. sæti deildarinnar.

Aron Rafn sem var búinn að leggja skóna á hilluna eftir síðustu leiktíð tók skóna af hillunni rétt fyrir tímabilið og hefur leikið með Haukum að undanförnu.

Hann var hinsvegar búinn að bóka sér í golfferð í sumar á þessum árstíma og það var því vitað fyrir tímabilið að Aron Rafn myndi missa af leiknum gegn ÍBV.

Haukar mæta Stjörnunni í 7.umferð Olís-deildarinnar á heimavelli næstkomandi fimmtudagskvöld klukkan 19:30.

Óvíst er hvort Aron Rafn verði kominn heim fyrir þann leik.