Stymmi Klippari mun í allan vetur spá í spilin og tippa á hvernig komandi umferð mun fara í Olís deildum karla og kvenna.

Hér að neðan má sjá hvernig hann telur að 5.umferð fari í Olís deild karla.

KA– ÍBV (Fimmtudagur 18:00) / Sigurvegari: KA

ÍBV mæta til leiks með nýjan þjálfara í brúnni eftir að Erlingur Richardsson tók við þýska liði Minden í byrjun vikunnar. Fá þeir þetta „new manager bounch“ sem er þekkt í íþróttum um allan heim? KA voru frábærir gegn Val í síðustu umferð og léku við hvern sinn fingur og áttu Bjarna Ófeig inni. Ég held að þeir haldi uppteknum hætti á heimavelli og ÍBV fari tómhentir heim.

Haukar - Víkingur (Fimmtudagur 19:00) / Sigurvegari: Haukar

Haukar með fullt hús á toppi deildinnar meðan Víkingar komust loksins á blað í síðust umferð eftir frábæran sigur á Þór. Eins og ég hef sagt í allan vetur þá finnst mér Haukar vera langbesta lið deildinnar og verða of stór biti fyrir Víking í leik kvöldsins.  

Fram - Afturelding (Fimmtudagur 20:30) / Sigurvegari: Afturelding

Skemmtilegur nágrannaslagur, oft kallaður baráttan um Bauhaus. Fram hafa verið virkilega slakir undanfarið og Einar Jónsson var myrkur í máli eftir leik liðsins gegn Stjörnunni í síðasta leik. Afturelding hafa komið mér á óvart í upphafi tímabils og verið eitt heitasta lið deildinnar eftir fjórar umferðir. Afturelding mun vinna þennan leik með minnsta mun þar sem úrslitin muni ráðast á lokasekúndunum leiksins.  

Valur - Þór (Föstudagur 18:30) / Sigurvegari: Valur

Valsmenn fá Þórsara í heimsókn áður en þeir halda á Evrópurúntinn sinn. Þórsara eru eflaust svekktir með að hafa tapað tveim stigum gegn Víking í síðustu umferð eftir að hafa verið búnir að vinna sig inn í leikinn. Valsmenn hafa verið heillum horfnir á heimavelli í vetur en ég held þeir nái að snúa við blaðinu í leiknum á föstudaginn og halda með sigur í farteskinu í þessa tvo útileiki í Evrópudeildinni.

Selfoss - FH (Laugardagur 19:30) / Sigurvegari: FH

Selfyssingar áttu erfitt uppdráttar gegn Aftureldingu í síðsta leik og stóð ekki steinn við steini í varnarleik liðsins. FH eru mættir heim eftir Evrópuævintýri á Spáni og það er spurning hvort það muni sitja eitthvað í hópnum. Ég held þó að Selfoss verði ekki of mikil fyrirstaða fyrir þá á laugardaginn en það væri virkilega gaman að sjá heimamenn flykkjast á völlinn á þessum skemmtilega leiktíma og gefa sínum mönnum í Selfossi smá auka orku úr stúkunni.

HK – Stjarnan (Sunnudagur 18:00) / Sigurvegari: Stjarnan

Áhugaverðasti leikur umferðinnar að mínu mati. Sannkallaður fjögurra stiga leikur í baráttunni í neðri helming deildinnar. Bæði lið unnu frábæra sigra í síðustu umferð og koma því með mikið sjálfstraust inn í þennan leik. Leikir þessara liða undanfarin ár hafa oft verið mikil skemmtun og ég held það verði engin breyting á sunnudaginn. Ég held að hópurinn hjá Stjörunni sé ögn sterkari á þessu stigi tímabilsins og þeir fari upp í Kórinn og fari með tvö dýrmæt stig heim í Garðabæinn.   

1.umferð (6 réttir)
2. umferð (4 réttir)
3.umferð (4 réttir)
4.umferð (1 réttur)