Stymmi Klippari mun í allan vetur spá í spilin og tippa á hvernig komandi umferð mun fara í Olís deildum karla og kvenna.

Hér að neðan má sjá hvernig hann telur að 4.umferð fari í Olís deild karla.

ÍBV– HK (Fimmtudagur 18:00) / Sigurvegari: ÍBV

ÍBV var með frábæran endurkomusigur gegn Fram í síðustu umferð eftir að hafa verið mest 9 mörkum undir. HK hafa staðið í liðum framan af hingað til á mótinu en það vantar töluvert upp á breiddina í hópnum sökum meiðsla. Ég sé fyrir mér að ÍBV verði í svona 45-50 mínútur að slíta HK frá sér en vinni þetta svo á lokamínútunum.

Stjarnan - Fram (Fimmtudagur 18:30) / Sigurvegari: Fram

Stjarnan slapp frá Selfossi með jafntefli í síðasta leik þar sem Siggi Dan varði víti þegar leiktíminn var runninn út en sýndu þó virkilega góða kafla í leiknum inn á milli. Fram naga sig í handarbökin eftir að hafa misst 9 marka forskot niður gegn ÍBV í síðasta leik og vilja kvitta fyrir það sem fyrst. Það hafa verið meiðsli í herbúðum Fram í upphafi tímabilsins en ég held það komi ekki að sök í kvöld og þeir klári Stjörnuna með 2-3 mörkum í Garðabænum.

Afturelding - Selfoss (Fimmtudagur 18:45) / Sigurvegari: Afturelding

Afturelding voru klaufar gegn ýliðunum á síðustu leiktíð og nýtt þjálfarateymi í Mosfellsbænum vill eflaust klára þessa leiki sem Afturelding eru taldir sterkari fyrirfram. Selfoss eru eflaust hundsvekktir að hafa ekki fengið tvö stig gegn Stjörnunni í síðasta leik. Ég held Afturelding muni klára þennan leik fagmannlega og sýna að þeir séu talsvert sterkara lið en Selfoss.

FH - Haukar (Fimmtudagur 19:30) / Sigurvegari: Jafntefli

Stórleikur umferðarinnar og baráttan um Memphis. Haukar eru á toppi deildarinnar og FH fylgja þar fast á eftir með einu stigi minna. Leikir þessara liða í deildarkeppninni hafa undanfarið endað í naglbýtum svo ég ætla að brydda upp á þeirri nýjung í spá minni og segja að þessi leikur endi með jafntefli þar sem jöfnunarmarkið kemur úr vítakasti eftir að leiktíminn er liðinn.

Víkingur - Þór (Föstudagur 19:00) / Sigurvegari: Þór

Víkingar hafa einunigs unnið 11 af síðuastu 96 leikjum sínum í efstu deild og það verður því miður 11 af síðustu 97 leikjum eftir þennan leik gegn Þór á föstudagskvöldið. Þórsara hafa byrjað tímabilið frábærlega og munu klárlega þennan leik með 2-3 mörkum.

Valur – KA (Föstudagur 19:30) / Sigurvegari: Valur

Lokaleikur umferðarinnar er undanúrslitaeinvígið frá síðustu leiktíð þar sem Valsmenn fá KA í heimsókn. Bæði lið eru með fjögur stig í upphafi tímabils og augljóst að liðin eru ennþá að spila sig saman. Dagur Árni Heimisson mætir á sinn gamla heimavöll með KA og ég held hann eigi eftir að eiga stórleik en það mun ekki duga þar sem Valsmenn með Gunnar Róbertsson í broddi fylkingar muni fara með sigur af hólmi líkt og í vor.   

1.umferð (6 réttir)
2. umferð (4 réttir)
3.umferð (4 réttir)