Haukar mæta RK Levalea 2010 Nikšić frá Svartfjallalandi í 32-liða úrslitum Evrópubikars kvenna í handbolta en dregið var í þriðju umferð keppninnar í morgun.

Haukar eru eina íslenska kvennaliðið sem tekur þátt í Evrópukeppni á þessu tímabili og voru í efri styrkleikaflokki þegar dregið var.

Andstæðingar Hauka frá Svartfjallalandi tryggðu sér sæti í 32-liða úrslitunum með því að leggja Differdange frá Lúxemborg að velli í annarri umferð keppninnar. Levalea vann einvígið samanlagt með þrettán mörkum, 56-43.

Fyrri leikir 32-liða úrslitanna fara fram helgina 7.-8. nóvember og síðari leikirnir helgina 14.-15. nóvember.

Haukar eiga heimaleikjarétt í fyrri leiknum samkvæmt drættinum en liðin geta samið um að leika báða leikina á sama stað.

Sigurliðið úr einvíginu tryggir sér sæti í 16-liða úrslitum Evrópubikarsins sem fara fram í janúar á næsta ári.

Alls taka 32 lið þátt í þriðju umferð keppninnar og þar á meðal eru færeysku liðin H71, Neistin og VÍF. H71 mætir HC Galychanka frá Úkraínu, Neistin leikur gegn LK Zug frá Sviss og VÍF mætir HK Slovan Duslo Šaľa frá Slóvakíu.