Danski landsliðsmarkvörðurinn Emil Nielsen greinir frá því í nýrri bók sinni að hann hafi verið sannfærður um að hann væri með blóðtappa í handleggnum rétt áður en úrslitaleikur Evrópumótsins 2024 gegn Frakklandi hófst. Nielsen lýsir miklum kvíða og taugaveiklun sem hefur fylgt honum fyrir stærstu leiki ferilsins. Emil Nielsen er þekktur fyrir yfirvegun og mikið sjálfstraust inni á handboltavellinum en í nýrri bók sinni, Emil Nielsen – Vejen til målet, dregur hann upp allt aðra mynd af líðan sinni fyrir mikilvægustu leikina. Bókin kemur út 18. nóvember hjá Lindhardt og Ringhof og er skrifuð í samstarfi við Jesper Gaarskjær. TV 2 Sport hefur fengið leyfi til að birta brot úr bókinni þar sem Nielsen lýsir meðal annars því sem gerðist í aðdraganda úrslitaleiks Evrópumótsins 2024 gegn Frakklandi í Köln. Daginn fyrir úrslitaleikinn hafði Nikolaj Jacobsen, landsliðsþjálfari Dana, tilkynnt Nielsen að hann myndi byrja leikinn í markinu í stað Niklas Landin. Þótt þetta væri eitt stærsta tækifæri ferilsins voru fyrstu viðbrögð Nielsen langt frá því að vera gleðileg. „Fokk. Mig langar alls ekki að gera þetta,“ hugsaði markvörðurinn þegar hann fékk tíðindin. Álagið jókst síðan þegar nær dró leiknum í Lanxess Arena í Köln. Nielsen lýsir því hvernig hann sat í búningsklefanum á meðan Jacobsen fór yfir síðustu taktísku fyrirmælin fyrir leikinn. Hann segist varla hafa heyrt orð af því sem þjálfarinn sagði. Skyndilega fann Nielsen fyrir þrýstingi í hægri handleggnum og tók eftir marbletti sem hann gat ekki útskýrt. Hann varð þá sannfærður um að eitthvað alvarlegt væri að. „Er ég með blóðtappa í handleggnum? Það er einhver þrýstingur þarna. Þetta á ekki að vera svona,“ skrifar Nielsen í bókinni. Á meðan liðsfélagarnir sátu í kringum hann og hlustuðu á síðustu fyrirmæli þjálfarans fór hugurinn á fullt. „Við erum búnir að hita upp inni í höllinni og nú er Nikolaj að fara yfir síðustu skilaboðin áður en við göngum inn á völlinn. Ég reyni að ná augnsambandi við sjúkraþjálfarann okkar. Ég er ekki lengur í neinum vafa. Ég er með blóðtappa í handleggnum.“ Nielsen íhugaði að kalla á sjúkraþjálfarann en ákvað að gera það ekki. Hann óttaðist að skapa óvissu meðal liðsfélaganna og fannst jafnframt vandræðalegt að líða svona rétt fyrir úrslitaleikinn. Í stað þess að leita aðstoðar ákvað Nielsen að halda óttanum fyrir sjálfan sig og búa sig undir að ganga inn á völlinn. Hann lýsir hugsunum sínum á þessum augnablikum á dramatískan hátt. „Ég verð bara að spila með þennan blóðtappa. Kannski er þetta síðasti leikurinn minn nokkurn tímann, en þá verður það bara þannig.“ Þetta voru hugsanir markvarðarins aðeins örfáum augnablikum áður en einn stærsti leikur ferils hans hófst. Um leið og leikurinn var flautaður á hvarf hins vegar öll óvissan og vanlíðanin sem hafði heltekið hann í búningsklefanum. Frásögn Nielsen gefur þannig sjaldgæfa innsýn í það mikla andlega álag sem getur fylgt því að standa í sviðsljósinu á stærsta sviði handboltans.

Handkastið er hlaðvarpsþáttur og fréttamiðill um íslenskan og erlendan handbolta.
Ritstjórar eru Arnar Daði Arnarsson og Styrmir Sigurðsson.