Handkastið hefur verið leiðandi í umfjöllun um íslenskan handbolta síðustu ár og nú fer að styttast í að tímabilið hér heima fari af stað. Handkastið heldur úti tveimur hlaðvarpsþáttum í viku þegar tímabilið er í gangi auk þess að fjalla vel og ítarlega um allt sem tengist íslenska boltanum hér á vefnum.

Olís-deild karla hefst í byrjun september en þangað til ætlar Handkastið að hita upp fyrir deildina og fjalla um öll liðin í deildinni.

Í dag förum við yfir nýliða Víkings.

Síðasta tímabil:
Víkingur vann Grill66-deildina í fyrra eftir harða baráttu við Gróttu alveg fram að síðustu umferð deildarinnar. Víkingur féll úr leik gegn Fram í bikarkeppninni eftir framlengingu.

Þjálfarinn:
Aðalsteinn Eyjólfsson er sennilega reynslu mesti þjálfari deildarinnar en hann er að fara inn í sitt þriðja tímabil með liðið.

Breytingar:
Engar stórvægilegar breytingar hafa orðið á leikmannahópi Víkings. Oft hafa nýliðar komið upp í Olís-deildina með mikið breytt til en Aðalsteinn treystir á concept-ið og hefur verið varfærinn á leikmannamarkaðnum og sótt leikmenn úr Grill66-deildinni.

Lykilmenn:
Ísak Óli Eggertsson, Ásgeir Snær Vignisson, Sigurður Páll Matthíasson

Fylgist með:
Ísak Óli Eggertsson var lang besti leikmaður Grill66-deildarinnar á síðustu leiktíð og stýrði sóknarleik Víkings afar vel. Olís-deildin er hinsvegar allt önnur skepna og það væri gaman að fylgjast með norðanmanninum spreyta sig í deild þeirra bestu eftir stjörnu tímabil í Grill66-deildinni í fyrra. Hefur fengið lyklavöldin af sóknarleik Víkings með tónlistarstjórann, Aðalstein Eyjólfsson á hliðarlínunni sem stýrir honum.

Framtíðin:
Sigurður Páll Matthíasson er einn af okkar efnilegustu línumenn sem getur bæði látið til sín taka varnar- og sóknarlega. Fékk smjörþefinn af Olís-deildinni fyrir þremur árum en er nú, reynslunni ríkari og þetta tímabil gæti orðið mikilvægt upp á framtíð Sigurðar.

Við hverju má búast:
Það man enginn eftir því hvenær Víkingur hélt sæti sínu í Olís-deildinni en nú á að sleppa því að líta í baksýnisspegilinn og horfa fram á við, í Virkinu. Víkingar eru bjartsýnir fyrir komandi tímabil og hafa sennilega aldrei mætt jafn stórir komandi inn í tímabil í Olís-deildinni sem nýliðar. Það hafa sennilega fá félög komið jafn oft upp úr Grill66-deildinni eins og Víkingur. Það er mikill meðbyr hjá félaginu og það yrði mikið áfall ef sagan endurtekur sig og félagið fellur enn og aftur niður um deild.

Sjá einnig:
Umfjöllun um karlalið Þórs
Umfjöllun um karlalið Aftureldingar
Umfjöllun um karlalið Vals
Umfjöllun um kvennalið ÍR