Handkastið hefur verið leiðandi í umfjöllun um íslenskan handbolta síðustu ár og nú fer að styttast í að tímabilið hér heima fari af stað. Handkastið heldur úti tveimur hlaðvarpsþáttum í viku þegar tímabilið er í gangi auk þess að fjalla vel og ítarlega um allt sem tengist íslenska boltanum hér á vefnum.

Olís-deild kvenna hefst í byrjun september en þangað til ætlar Handkastið að hita upp fyrir deildina og fjalla um öll liðin í deildinni.

Í dag förum við yfir lið KA/Þórs.

Síðasta tímabil:
KA/Þór voru nýliðar í Olís-deild kvenna á síðustu leiktíð og það varð snemma ljóst að liðið þyrfti ekki að hafa áhyggjur af fallbaráttunni. Liðið hóf síðasta tímabil af miklum krafti og sótti góð stig strax í upphafi tímabils. Liðið fór einnig alla leið í Final4 helgina í Powerade-bikarnum en tapaði gegn bikarmeisturunum í undanúrslitum keppninnar. 

Þjálfarinn:
Jónatan Magnússon er á leið inn í sitt þriðja tímabil sem þjálfari liðsins en hann tók við liðinu í Grill66-deildinni fyrir tveimur árum og kom liðinu upp í fyrstu tilraun án þess að tapa leik.

Breytingar:
Töluverðar breytingar hafa orðið á liði KA/Þórs frá síðustu leiktíð og margir lykilmenn hafa yfirgefið félagið. Félaginu hefur gengið erfiðlega að bæta við sig leikmönnum og hefur liðið verið fámennt á æfingum á undirbúningstímabilinu og þá hefur liðið verið fámennt í þeim æfingaleikjum sem liðið hefur tekið í aðdraganda mótsins.

Lykilmenn:
Lenka Ratvajská, Jóan Rúnadóttir, Bergrós Ásta Guðmundsdóttir

Fylgist með:
Bergrós Ásta Guðmundsdóttir vann nánast öll einstaklingsverðlaun sem hægt var að vinna á lokahófi HSÍ á þar síðustu leiktíð eftir frábæra frammistöðu í Grill66-deildinni. Hún var í stóru hlutverki með U20 ára landsliðinu á HM í Kína í sumar og fékk eldskírn í Olís-deildinni á síðustu leiktíð. Mætir reynslu ríkari í nýtt tímabil og með mikla ábyrgð á herðum sér.

Framtíðin:
Jóan Rúnadóttir er bráðefnilegur Færeyingur sem KA/Þór fékk í sumar frá færeysku meisturnum í Kyndil. Er fastamaður í yngri landsliðum Færeyja og gætu sett svip sinn á leik KA/Þórs í vetur.

Við hverju má búast:
Bæti liðið ekki við sig fleiri leikmönnum á komandi vikum gæti þetta orðið langur og erfiður vetur. Liðið má alls ekki við meiðslum enda er hópurinn þunnur. Aldís Ásta Heimisdóttir kemur til baka eftir barnsburð seint á þessu ári og það mun hjálpa liðinu til muna. Það verður hörð barátta liðanna fyrir neðan 4.sætið og þar gæti KA/Þór lent undir. Það er nokkuð ljóst að mikið mun mæða á þeim lykil leikmönnum liðsins í vetur.

Sjá einnig:
Umfjöllun um karlalið Selfoss
Umfjöllun um karlalið Víkings
Umfjöllun um karlalið Þórs
Umfjöllun um karlalið Aftureldingar
Umfjöllun um karlalið Vals
Umfjöllun um kvennalið ÍR