Ein umferð er lokið í þýsku Bundesligunni en 2.umferðin hefst strax í kvöld. Nokkrir leikmenn báru af í fyrstu umferðinni og stimpluðu sig inn með stæl.

Þýski handboltamiðillinn handball-world.news tók saman sjö leikmenn sem vert sé að fylgjast sérstaklega með á komandi mánuðum. Þar er að finna bæði þekkta leikmenn, nýja liðsmenn og nokkur nöfn sem komu heldur betur á óvart í fyrstu umferð.

Einn leikur segir auðvitað ekki alla söguna og það er allt of snemmt að draga stórar ályktanir um tímabilið. Fyrsta umferðin gaf þó ákveðnar vísbendingar.

Aymeric Minne – Flensburg

Frakkinn Aymeric Minne þurfti ekki langan tíma til að láta vita af sér í nýju liði. Hann skoraði sex mörk í 33-31 sigri Flensburgar á Eisenach og stýrði jafnframt sóknarleik liðsins af miklum krafti. Minne kom til Flensburgar fyrir tímabilið og virðist ætla að verða stór hluti af sóknarleik þýska stórliðsins.

Erik Balenciaga – Melsungen

Spánverjinn Erik Balenciaga skoraði tvö mörk þegar Melsungen tapaði 31-33 fyrir Füchse Berlin en þrátt fyrir fá mörk hafði hann mikil áhrif á leik liðsins. Hann var einn þeirra sem drógu Melsungen aftur inn í leikinn og verður áhugavert að sjá hvort hann taki enn stærra hlutverk þegar líður á tímabilið.

Domen Makuc – Kiel

Domen Makuc átti afar góða frumraun með THW Kiel. Slóveninn skoraði sex mörk í 35-27 sigri Kiel gegn Lemgo og steig sérstaklega upp í síðari hálfleik. Eftir því sem leið á leikinn tók Makuc meiri stjórn á sóknarleiknum og sýndi hvers vegna miklar væntingar eru gerðar til hans.

Miro Schluroff – Gummersbach

Ef til vill var enginn leikmaður jafn áberandi og Miro Schluroff í 1. umferðinni. Gummersbach tapaði 31-33 gegn ríkjandi meisturum Magdeburg en Schluroff gerði sér lítið fyrir og skoraði 11 mörk – öll úr opnum leik. Magdeburg tókst að lokum að sækja sigurinn en Schluroff gerði varnarmönnum meistaranna lífið einstaklega erfitt.

Matthes Langhoff – Füchse Berlin

Eftir að Lasse Andersson yfirgaf Füchse Berlin varð ljóst að ákveðið skarð myndi myndast í sókn liðsins. Matthes Langhoff virðist hins vegar tilbúinn að fylla það skarð. Hann skoraði níu mörk í 33-31 sigri Berlínar á Melsungen og varð markahæsti leikmaður liðsins. Hann skoraði þar með meira en bæði Mathias Gidsel og Tim Freihöfer, sem skoruðu sjö mörk hvor.

Elias Newel – Göppingen

Elias Newel var einnig á meðal þeirra sem vöktu athygli. Göppingen vann 32-30 sigur á Erlangen og Newel skoraði sjö mörk. Þýski miðillinn bendir á að leikmaður á borð við Newel geti orðið afar mikilvægur fyrir Göppingen þegar kemur að því að leysa leikina þegar mest reynir á.

Daniel Rebmann – Balingen-Weilstetten

Hjá nýliðunum í Balingen-Weilstetten var það markvörðurinn Daniel Rebmann sem stal senunni. Balingen lagði Hamburg 30-26 að velli eftir jafnan fyrri hálfleik, 17-17. Rebmann kom inn eftir hlé og breytti leiknum. Hann varði níu skot í síðari hálfleik og átti stóran þátt í því að nýliðarnir gátu stungið af frá Hamburg.

Þýska deildin er því rétt að byrja en strax í fyrstu umferðinni komu nokkrir nýir kandídatar fram á sjónarsviðið. Stóru stjörnurnar eiga eflaust eftir að láta meira til sín taka þegar líður á veturinn – en það verður ekki síður áhugavert að fylgjast með hvort þessir sjö leikmenn haldi áfram að láta til sín taka.