HM félagsliða í handbolta hefst í Egyptalandi í dag en tíu lið frá öllum sex heimsálfum taka þátt í mótinu sem lýkur með úrslitaleik þann 1. október.

Barcelona mætir til leiks sem ríkjandi heimsmeistari félagsliða og tveir íslenskir landsliðsmenn eru í herbúðum spænska stórliðsins, þeir Viktor Gísli Hallgrímsson og Janus Daði Smárason.

Barcelona vann Veszprém eftir framlengdan úrslitaleik á HM félagsliða í fyrra og tryggði sér þar með sinn sjötta heimsmeistaratitil félagsliða. Enginn hefur unnið keppnina oftar en Barcelona.

Spænska stórliðið getur því bætt sjöunda titlinum í safnið í Egyptalandi og um leið varið titilinn frá því í fyrra. Barcelona er einnig ríkjandi Evrópumeistari eftir að hafa unnið Meistaradeild Evrópu í júní.

Keppnin hefst í dag með tveimur leikjum í undankeppni. Veszprém mætir Sydney Uni frá Ástralíu og egypska liðið Zamalek leikur gegn Los Angeles Handball Club. Sigurvegararnir úr leikjunum tveimur tryggja sér sæti í riðlakeppninni.

Barcelona hefur hins vegar leik á morgun, föstudag, þegar liðið mætir brasilíska liðinu E.C. Pinheiros.

Barcelona er í A-riðli ásamt Pinheiros, Montada frá Marokkó og öðru liðinu sem kemur úr undankeppninni. Füchse Berlin er í B-riðli ásamt Al Ahly frá Egyptalandi, Burgan frá Kúveit og sigurvegara úr hinum leik undankeppninnar.

Efsta lið hvors riðils fer beint í úrslitaleikinn þann 1. október en liðin í öðru sæti leika um bronsverðlaunin.

Alls taka tíu lið þátt í HM félagsliða að þessu sinni, tveimur fleiri en undanfarin tvö ár. Mótið fer fram í New Administrative Capital í Egyptalandi og er þetta þriðja árið í röð sem keppnin er haldin þar.