Það var heldur óvenjuleg ástæða fyrir því að Magnus Norlyk, leikmaður danska stórliðsins Álaborgar, var ekki með liðinu þegar það heimsótti Zagreb í Meistaradeild Evrópu á fimmtudagskvöldið í síðustu viku.

Norlyk átti að vera í leikmannahópi Álaborgar fyrir leikinn í Króatíu en mistök við bókun flugmiða urðu til þess að hann komst ekki með liðinu í ferðina. Frá þessu greindi dansk miðillinn, TV 2 Sport en Norlyk þurfti því að fylgjast með liðsfélögum sínum heiman frá Danmörku.

Norlyk var ekki eini leikmaðurinn sem vantaði í hóp Álaborgar því norska stórstjarnan Sander Sagosen var einnig fjarverandi, en í hans tilfelli voru það meiðsli sem komu í veg fyrir þátttöku.

Fjarvera Norlyks kom þó ekki að sök því Álaborg vann sannfærandi tíu marka sigur, 33–23, á króatíska liðinu. Norlyk var síðan kominn aftur í leikmannahóp Álaborgar í dag þegar liðið vann KIF Kolding, 37–32, í dönsku úrvalsdeildinni. Hann skoraði þrjú mörk úr þremur skotum í leiknum.

Álaborg tekur aftur á móti Zagreb í Meistaradeildinni á miðvikudaginn og þá ætti Norlyk að geta látið til sín taka, að því gefnu að flugmiðamálin verði ekki aftur til trafala.