Danska landsliðskonan Helena Elver útilokar ekki að yfirgefa ungverska stórliðið Györ fyrr en áætlað var vegna þeirra miklu fjárhagsvandræða sem félagið glímir við. Elver hefur þegar samið við danska stórliðið Odense frá næsta sumri en óvissa ríkir nú um hvort félagaskiptunum verði flýtt. Györ hefur verið í miklum fjárhagserfiðleikum að undanförnu og hafa leikmenn félagsins verið beðnir um að samþykkja verulegar launalækkanir til að tryggja áframhaldandi rekstur félagsins. Forráðamenn Györ hafa jafnframt opnað á þann möguleika að leikmenn yfirgefi félagið til að draga úr rekstrarkostnaði. Elver, sem er 26 ára gömul, hefur þegar skrifað undir fjögurra ára samning við Odense sem tekur gildi sumarið 2027. Hún segir að markmiðið sé enn að klára tímabilið í Ungverjalandi en viðurkennir að hún geti ekki fullyrt að það verði raunin. „Það get ég ekki sagt með hundrað prósenta vissu. Markmið mitt er hundrað prósent að klára tímabilið hér hjá Györ,“ sagði Elver í samtali við danska TV 2 Sport. Ummæli hennar koma í kjölfar þess að dönsku stórliðunum Team Esbjerg og Odense hafa verið boðnir fjölmargir leikmenn frá Györ í gegnum umboðsmenn. Bjarne Pedersen, stjórnarformaður Team Esbjerg, hefur meðal annars staðfest að félaginu hafi verið boðnir fimm til sex leikmenn úr núverandi leikmannahópi ungverska stórliðsins. Lasse Honoré, framkvæmdastjóri Odense, hefur einnig staðfest að félaginu hafi verið boðinn stór hluti leikmannahóps Györ. Hann segir að félagið fylgist sérstaklega með stöðu Elver og sé tilbúið að skoða þann möguleika að fá hana til félagsins fyrr en upphaflega var samið um. Honoré bendir þó á að þrír aðilar þurfi að ná samkomulagi svo af því geti orðið, Odense, Györ og leikmaðurinn sjálfur. Elver lék með Odense frá árinu 2020 til 2025 áður en hún gekk til liðs við Györ. Hún er því vel kunnug félaginu sem hún hefur ákveðið að snúa aftur til. Fjárhagsvandræði Györ hafa vakið mikla athygli í evrópskum handbolta enda hefur félagið verið eitt það sigursælasta í sögu Meistaradeildarinnar. Forráðamenn þess hafa varað við því að gjaldþrot geti orðið að veruleika náist ekki samkomulag um nauðsynlegar sparnaðaraðgerðir. Þrátt fyrir óvissuna segist Elver ætla að einbeita sér að handboltanum og ljúka tímabilinu með Györ, ef aðstæður leyfa. Hvort hún verði áfram í Ungverjalandi fram á sumar eða gangi fyrr til liðs við Odense mun því ráðast af framvindu mála á næstu vikum og mánuðum.

Handkastið er hlaðvarpsþáttur og fréttamiðill um íslenskan og erlendan handbolta.
Ritstjórar eru Arnar Daði Arnarsson og Styrmir Sigurðsson.