Ungverski leikstjórnandinn, Rea Barnabas leikmaður Stjörnunnar tognaði á nára í sigri liðsins gegn FH síðastliðið föstudagskvöld.

Rea hafði skorað þrjú mörk í leiknum áður en hann haltraði útaf um miðbik seinni hálfleiks og kom ekkert meira við sögu í leiknum. Stjarnan vann leikinn með fimm mörkum 28-23 eftir að hafa verið 11-14 undir í hálfleik.

Hrannar Guðmundsson þjálfari Stjörnunnar sagði síðan í viðtali við Handkastið eftir leik að um tognun á nára væri um að ræða.

Rea er þar með sjötti leikmaður Stjörnunnar á meiðslalistanum en fyrir á meiðslalistanum eru þeir, Adam Thorstensen, Egill Magnússon, Tandri Már Konráðsson, Sveinn Andri Sveinsson og Jóhannes Björgvin.

Stjarnan er með fjögur stig að loknum fjórum umferðum í Olís-deildinni en liðið mætir nýliðum Þórs á Akureyri í 5.umferðinni á fimmtudagskvöld.