Athygli vakti að Lena Margrét Valdimarsdóttir var ekki í leikmannahópi Fram þegar liðið hóf tímabilið með 30-24 sigri á nýliðum Gróttu í 1. umferð Olís-deildar kvenna á laugardaginn.

Lena Margrét gekk til liðs við Fram í sumar eftir eins árs dvöl hjá sænska liðinu Skara. Þegar málið var skoðað betur kom í ljós að félagaskipti hennar frá Skara yfir í Fram höfðu ekki enn gengið í gegn og var hún því ekki lögleg með liðinu gegn Gróttu.

Fjarvera hennar kom þó ekki að sök og vann Fram leikinn með sex marka mun, 30-24. Ekkert varð hinsvegar úr endurkomu Lenu Margrétar.

Haraldur Þorvarðarson, þjálfari Fram, staðfesti í samtali við Handkastið að Lena Margrét yrði að öllum líkindum klár í slaginn þegar Fram heimsækir Stjörnuna í 2. umferðinni næstkomandi föstudag klukkan 18:00.

Svipað mál kom upp í Breiðholtinu þar sem markvörðurinn Elísa Helga Sigurðardóttir var ekki í leikmannahópi ÍR gegn Stjörnunni. Félagaskipti hennar yfir í ÍR höfðu heldur ekki gengið í gegn.

Það kom í ljós þegar starfsmaður ÍR ætlaði að velja leikmannahóp liðsins í HB-ritara, leikskýrslukerfi HSÍ, um klukkustund fyrir leik liðanna í 1. umferðinni. Elísa Helga var því ekki lögleg og þurfti að sitja hjá.