Samkvæmt heimildum Handkastsins hefur Fram haft samband við hægri hornamanninn Gabríel Martinez Róbertsson og kannað þann möguleika að hann gangi til liðs við félagið fyrir komandi tímabil í Olís-deild karla.

Gabríel, sem er fæddur árið 1999, er uppalinn hjá ÍBV og hefur leikið allan sinn feril með Vestmannaeyingum. Hann lék sitt fyrsta tímabil með meistaraflokki félagsins tímabilið 2018/2019 og varð Íslandsmeistari með ÍBV tímabilið 2022/2023.

Á síðustu leiktíð kom Gabríel einungis við sögu í fjórum leikjum með ÍBV þar sem hann skoraði 10 mörk en hann hafði ákveðið að leika ekki með liðinu á síðustu leiktíð en kom liðinu til bjargar vegna meiðsla vandræða hjá félaginu á tímapunkti.

Leit Fram að hægri hornamanni kemur í kjölfar þess að Eiður Rafn Valsson var seldur til FH í gær þrátt fyrir að hafa nýlega skrifað undir nýjan langtímasamning.

FH HEFUR KEYPT EIÐ RAFN

Verði af félagaskiptum Gabríels til Fram myndi félagið fylla mikilvægt skarð í leikmannahópi sínum fyrir komandi keppnistímabil en Fram endaði í 7.sæti Olís-deildarinnar á síðustu leiktíð eftir að hafa orðið Íslands- og bikarmeistari tímabilið áður.