Arnór Atlason hefur framlengt samning sinn sem þjálfari danska úrvalsdeildarfélagsins Holstebro til ársins 2028. Þetta tilkynnti félagið fyrir leik dagsins hjá liðinu gegn Skjern sem er nú í gangi.

Arnór tók við liðinu sumarið 2023 en áður hafði hann verið aðstoðarþjálfari Álaborgar.

„Við erum ekki búin ennþá, það er möguleiki á meiru. Ég vil sjá hversu langt við getum farið með þetta, en við þurfum að fá alla með í ferðalagið,“ segir Arnór Atlason á heimasíðu danska félagsins.

Arnór átti farsælan leikmannaferil í Danmörku og víðar en hann lék með Magdeburg, FCK, AG, Flensburg, St. Raphael og Álaborg áður en hann lagði skóna á hilluna og sneri sér að þjálfun.

Auk þess að þjálfa Holstebro er Arnór Atlason aðstoðarlandsliðsþjálfari Íslands.