Samkvæmt heimildum Handkastsins fara vináttulandsleikir Íslands gegn Svíþjóð fram í Kaplakrika, heimavelli FH í Hafnarfirði. Leikirnir fara fram fimmtudagskvöldið 19. mars og laugardagskvöldið 21.mars.

Gera má ráð fyrir að uppselt verði á leikina gegn Svíum enda er mikill áhugi hér á landi fyrir Strákunum okkar. Lítið hefur þó farið fyrir þessum leikjum og HSÍ hefur ekki enn byrjað að auglýsa leikina, né keppnisstað og hvað þá miðasölu á leikina þó ekki sé nema rúmar tvær vikur í fyrri leik þjóðanna.

Þá bólar ekkert á leikmannahópnum sem Snorri Stein kýs nota í verkefninu en sænski landsliðshópurinn var tilkynntur í síðasta mánuði. Hér er hægt að sjá sænska landsliðshópinn sem kemur til landsins.

Bæði íslenska og sænska landsliðið hafa tryggt sér þátttökurétt á HM á næsta ári eftir góðan árangur á Evrópumótinu í janúar. Ísland endaði í 4.sæti á EM á meðan Svíþjóð endaði í 6.sæti.

Ísland og Svíþjóð mættust í milliriðli Evrópumótsins í janúar þar sem Ísland vann frábæran átta marka sigur, 35-27 en leikurinn fór fram í Malmö í Svíþjóð. Sigur Íslands var mikilvægur partur í því að tryggja sæti í undanúrslitum mótsins.

Ísland lék síðasta æfingaleiki hér á landi gegn Færeyjum í nóvember 2023. Ísland vann báða leikina, þann fyrri með einu marki og þann seinni með fimmtán mörkum.