Fyrrum aðstoðarþjálfari íslenska landsliðsins, Gunnar Magnússon sem í dag stýrir Haukum í Olís-deild karla og leikgreinir leiki fyrir Dag Sigurðsson fyrir króatíska landsliðið segist vera spenntur fyrir komandi Evrópumóti í janúar.

Hann segir að mótið sem framundan er verði algjör veisla.

,,Ég er alltaf bjartsýnn á hverju ári og maður vonar alltaf að það sé komið að því að liðið stígi næsta skref. Hópurinn er frábær og ég hef mikla trú á liðinu," sagði Gunnar í viðtali við Handkastið eftir sigur Hauka á HK í 8-liða úrslitum Powerade-bikarsins í síðustu viku.

Hann var spurður út í val Snorra Steins og ákvörðunina að skilja hornamennina, Stiven Tobar Valencia og Sigvalda Björn Guðjónsson eftir heima.

,,Þetta eru þrír góðir leikmenn í einni stöðu. Það þarf einhver að vera heima, það geta ekki allir verið þarna. Eðlilega þegar þú ert með þrjá góða leikmenn í sömu stöðunni þá skiptist þetta upp milli fylkinga. En þetta sýnir hversu mikil breiddin er orðin í liðinu og hvað við eigum marga leikmenn. Það var nokkuð ljóst að það yrðu tveir góðir hornamenn eftir heima, sama hverjir hefðu verið valdir," sagði Gunnar um ákvörðun Snorra Steins.