Fyrri leikir átta liða úrslita Meistaradeildar kvenna fara fram um helgina þar sem liðin berjast um sæti í úrslitahelginni í Búdapest.

Tvö frönsk lið, tvö rúmensk, tvö dönsk og tvö ungversk halda áfram í keppninni og ljóst er að nokkrir af stærstu leikjum tímabilsins eru framundan.

Stærsti leikur helgarinnar verður á sunnudag þegar FTC tekur á móti Metz í endurtekningu á dramatísku einvígi liðanna fyrir þremur árum. Þá mætast einnig Odense og ríkjandi meistarar Györi í endurtekningu á úrslitaleik síðasta tímabils.

Á laugardag hefjast átökin með tveimur leikjum þegar Gloria Bistrita tekur á móti Brest og Esbjerg fær CSM Búkaresti í heimsókn.

Leikir helgarinnar

Gloria Bistrita - Brest | Laugardagur 18.apríl kl 14:00
Gloria Bistrita er komið í átta liða úrslit í fyrsta sinn í sögu félagsins eftir að hafa slegið út Ikast í umspilinu. Rúmenska liðið hefur farið langt fram úr væntingum á sínu öðru tímabili í Meistaradeildinni og kemur inn í einvígið full sjálfstrausts eftir að hafa unnið fjóra leiki í röð.

Verkefnið verður þó gríðarlega erfitt, því Brest er eitt sterkasta sóknarlið keppninnar með 476 mörk í 14 leikjum, eða rúmlega 34 mörk að meðaltali í leik.

Stærstu stjörnurnar eru án efa Danila So Delgado hjá Gloria og Anna Vyakhireva hjá Brest. Delgado hefur skorað 104 mörk í keppninni og er næstmarkahæst allra leikmanna, á meðan Vyakhireva hefur skorað 93 mörk fyrir franska liðið.

Ana Gros leikur einnig stórt hlutverk hjá Brest, en hún er á sínu síðasta tímabili og stefnir á að enda ferilinn með sæti í FINAL4 í Búdapest.

Esbjerg - CSM Búkaresti | Laugardagur 18.apríl kl 16:00
Esbjerg er komið í átta liða úrslit fimmta árið í röð og hefur komist í FINAL4 öll síðustu fjögur tímabil. Nú bíður liðsins enn eitt stórt verkefnið gegn CSM Búkaresti.

Þetta er endurtekning á einvígi liðanna frá síðasta ári þegar Esbjerg hafði betur samanlagt 55:52. Liðin hafa einnig mæst á þessu stigi keppninnar tvö önnur tímabil, þannig að um kunnuglegt stef er að ræða.

Esbjerg er með einn besta sóknarleik keppninnar og þar fer Henny Reistad fremst í flokki. Hún er markahæsti leikmaður Meistaradeildarinnar með 116 mörk og hefur verið nánast óstöðvandi í vetur.

CSM er þó með öflugt lið og fór beint í átta liða úrslit eftir frábæra frammistöðu í riðlakeppninni. Elizabeth Omoregie hefur verið helsta sóknarvopnið með 84 mörk og liðið hefur lengi stefnt á að komast aftur í úrslitahelgina í Búdapest.

Þetta gæti orðið eitt jafnasta einvígið í þessari umferð.

FTC - Metz | Sunnudagur 19.april kl 12:00
"Leikur helgarinnar" hjá EHF fer fram í Ungverjalandi þegar FTC fær Metz í heimsókn.

FTC er komið í átta liða úrslit fjórða árið í röð og hefur verið á mikilli siglingu eftir erfiða byrjun á tímabilinu. Ungverska liðið sló Dortmund út í umspilinu og kemur inn í einvígið með mikið sjálfstraust.

Metz hefur hins vegar verið eitt stöðugasta lið Evrópu undanfarin ár. Franska liðið hefur komist í FINAL4 tvö ár í röð og vann 12 af 14 leikjum sínum í riðlakeppninni.

Liðin mættust síðast í átta liða úrslitum árið 2023. Þá vann Metz fyrri leikinn með sex marka mun í Ungverjalandi, en FTC svaraði með stórkostlegum sigri í Frakklandi og fór áfram samanlagt.

Sarah Bouktit hefur verið markahæst hjá Metz með 89 mörk, á meðan Petra Simon, Katrin Klujber og Emily Vogel hafa samanlagt skorað 227 mörk fyrir FTC.

Odense - Györ | Sunnudagur 19.apríl kl 14:00
Síðasti leikur helgarinnar er einnig einn sá stærsti þegar Odense og Györ mætast í endurtekningu á úrslitaleik síðasta tímabils.

Þá hafði Györ betur, 29:27, og lyfti Meistaradeildarbikarnum í sjöunda sinn. Ungverska liðið hefur einnig unnið bæði fyrri átta liða úrslitaeinvígin gegn Odense, þannig að sagan er ekki með danska liðinu.

Odense hefur þó verið sterkt á tímabilinu og sló DVSC út í umspilinu. Liðið er komið í átta liða úrslit fjórða árið í röð og vill hefna fyrir tapið í úrslitaleiknum í fyrra.

Thale Rushfeldt Deila og Elma Halilcevic hafa verið markahæstar hjá Odense með 80 og 72 mörk, á meðan Dione Housheer og Bruna de Paula hafa skorað mest fyrir Györ.

Odense hefur aðeins unnið einn af 13 leikjum sínum gegn Györ, en sá sigur kom í Ungverjalandi í október 2024. Það sýnir að danska liðið veit að það getur unnið ríkjandi Evrópumeistara – en það þarf nær fullkomna frammistöðu til að gera það aftur.