Füchse Berlin og Bergischer áttust við í úrslitum þýska bikarsins í dag.

Füchse Berlin höfðu betur gegn Lemgo í undanúrslitum en Bergischer unnu Magdeburg í miklum spennuleik í gær þar sem þurfti vítakast keppni og bráðabana til að finna sigurvegara.

Úrslitaleikurinn í dag náði þó aldrei að vera spennandi þar sem Füchse Berlin stýrðu ferðinni algjörlega í Lanxess Arena í Köln þar sem úrslitakeppnin fór fram. Arnór Þór Gunnarsson er þjálfari Bergischer og náðu hans drengir að standa í Füchse Berlin framan af fyrri hálfleik en undir loks hálfleiksins sigldu Berlínar Refirnir framúr og leiddu með fimm mörkum í hálfleik 22-17.

Þeir slógu svo ekkert af í síðari hálfleik og unnu að lokum öruggan níu marka sigur, 42-33, og Füchse Berlin því þýskir bikarmeistarar. Dönsku skytturnar í liði Füchse Berlin voru allt í öllu í dag og skoraði Lasse Andersson 10 mörk og Mathias Gidsel var með 9 mörk. Lasse Andersson var einnig valinn verðmætasti leikmaður helgarinnar.

Lemgo og Magdeburg áttust við í leik um þriðja sætið í morgun og fór svo að Lemgo hafði betur, 35-31. Tim Suton var markhæstur í liði Lemgo með 8 mörk en hjá Magdeburg skoraði Matthias Musche 6 mörk. Íslensku strákarnir í Magdeburg höfðu hægt um sig í leiknum og skoruðu Gísli Þorgeir Kristjánsson og Ómar Ingi Magnússon tvö mörk hvor en Elvar Örn Jónsson gerði eitt mark.