Óvissa ríkir um það hvort Jovan Kukobat verði áfram í herbúðum HK í Olís-deild karla á næstu leiktíð en Kukobat glímdi við meiðsli nær allt þetta tímabil og gat lítið spilað með liðinu í vetur.

Halldór Jóhann Sigfússon þjálfari HK sagði í samtali við Handkastið að það væri óvíst hvað yrði . Jovan lék sjö leiki með HK í vetur. Hann gekk í raðir félagsins fyrir síðustu leiktíð og var því að klára sitt annað tímabil hjá félaginu.

,,Það er ekki alveg komið á hreint ennþá. Hann er með tilboð frá okkur og því erfitt að segja um það," sagði Halldór Jóhann aðspurður að því hvort Jovan Kukobat yrði áfram í herbúðum HK.

HK endaði í 8.sæti Olís-deildarinnar og tapaði gegn Val 2-0 í 8-liða úrslitum Íslandsmótsins en liðið var hársbreidd frá því að vinna fyrsta leik liðanna og komast í 1-0 í einvíginu.

Kukobat hefur víða komið við á ferlinum hér á landi en hann hefur meðal annars leikið með KA, Þór, Víking og Aftureldingu.