Tryggvi Garðar Jónsson er samkvæmt heimildum Handkastsins á leiðinni til Noregs og mun leika í norsku úrvalsdeildinni á næstu leiktíð.

Tryggvi Garðar fer til Noregs eftir eitt ár í Austurríki þar sem hann lék undir stjórn Hannesar Jóns Jónssonar hjá Alpla Hard. Tryggvi Garðar gekk í raðir Alpla Hard síðasta sumar eftir að hafa orðið bæði Íslands- og bikarmeistari með Fram á sínu öðru tímabili með félaginu.

Tryggvi Garðar sem er uppalinn hjá Val er samkvæmt heimildum Handkastsins að ganga í raðir nýliða Viking TIF sem enduðu í 2.sæti norsku 1.deildarinnar en liðið vann úrvalsdeildarlið Halden í umspili um laust sæti í norsku úrvalsdeildinni 2-1.

Samkvæmt heimildum Handkastsins höfðu Íslandsmeistarar Vals áhuga á að fá Tryggva Garðar heim á Hlíðarenda en skyttan stóra og stæðilega hefur ákveðið að framlengja dvöl sinni erlendis.