Þriggja ára samningur sem Árni Bragi Eyjólfsson skrifaði undir við Aftureldingu sumarið 2023 rann út um mánaðarmótin. Árni Bragi er því samningslaus og óvíst er hvort hann leiki með liðinu í Olís-deildinni á næstu leiktíð.

Árni Bragi sem er uppalinn í Aftureldingu hefur á ferlinum leikið með Kolding í dönsku úrvalsdeildinni og þá lék hann eitt tímabil með KA 2020/2021 og varð meðal annars markakóngur Olís-deildarinnar það tímabil.

,,Eins og staðan er í dag þá ég er ekki búinn að ákveða neitt. Ég sé hinsvegar ekki fyrir mér að fara neitt annað. Það þyrfti í það minnsta að vera eitthvað mjög spennandi. Eins og staðan er í dag þá snýst þetta aðallega um það hvort ég ætla að hætta eða að vera áfram í Mosó," sagði Árni Bragi í samtali við Handkastið er hann var spurður út í framtíðina hjá sér.

Árni Bragi skoraði 128 mörk fyrir Aftureldingu í Olís-deildinni og úrslitakeppninni í vetur en liðið endaði í 6.sæti deildarinnar og tapaði í 8-liða úrslitum gegn Haukum í oddaleik 2-1. Hann var markahæsti leikmaður Aftureldingar á tímabilinu.

Ihor Kopyshynskyi annar markahæsti leikmaður liðsins í vetur hefur yfirgefið félagið en samningi hans við félagið var rift. Hákon Daði Styrmisson gekk á dögunum í raðir félagsins frá ÍBV og fyllir skarð Ihors.