Franska kvennaliðið Metz Handball sem vann Meistaradeild Evrópu á dögunum fékk hæstu verðlauna greiðsluna sem úthlutað var af EHF en samanlagt var tæplega 900 þúsund evrum úthlutað til þeirra fjögurra liða sem komust í úrslitahelgina í Búdapest sem fram fór í byrjun júní.

Það mætti segja að fjárhagslegu verðlaunin séu nokkuð hófleg í samanburði við margar aðrar evrópskar íþróttagreinar.

Samkvæmt Handball Feminin skiptust alls 877.500 evrur á milli liðanna fjögurra sem tóku þátt í Final4-keppni Meistaradeildarinnar.

Nýkrýndir Evrópumeistarar Metz Handball fengu stærstan hlut verðlaunafjárins, eða 273.500 evrur eða tæplega 40 milljónir íslenskra króna. Ungverska stórliðið Györ, sem laut í lægra haldi í úrslitaleiknum, fékk 241.000 evrur (tæplega 35 milljónir íslenska króna) inn á sinn bankareikning.

Rúmenska liðið CSM Búkarest, sem hafnaði í þriðja sæti, fékk 195.000 evrur í sinn hlut, en franska félagið Brest Bretagne Handball fékk 168.000 evrur fyrir þátttöku sína.