Þráinn Orri Jónsson hefur framlengt samningi sínum við Hauka og mun hann því leika áfram með félaginu á næsta tímabii.

Þráinn sem verður 33 ára í júlí gerir eins ár samning við Hauka.

Þráinn Orri sem er uppalinn í Gróttu gekk í raðir Hauka frá Bjerringbro-Silkeborg í Danmörku sumarið 2020 en hann hefur leikið 164 leik fyrir Hauka og skorað í þeim 335 mörk

,,Þráinn Orri hefur verið einn besti línumaður deildarinnar eftir komu sína til Hauka en Þráinn lék til að mynda með íslenska landsliðinu á EM 2022 sem leikmaður Hauka þar sem hann varð fyrir því ólani að slíta krossband. Þráinn mun á komandi tímabili mynda gott línumannspar með Sigurði Jefferson sem kemur til liðs við Hauka fyrir komandi tímabil," segir í tilkynningunni frá Haukum.

,,Það að Þráinn framlengi samning sinn við Hauka er mikið ánægjuefni og mun hjálpa Haukaliðinu í þeim markmiðum að vera á toppnum á öllum vígstöðum og keppast um alla þá titla sem í boði eru," segir ennfremur í tilkynningunni.

Þráinn Orri varð bikarmeistari með Haukum á síðustu leiktíð en liðið ætlar sér stóra hluti á næstu leiktíð en liðið hefur fengið Sigurð Jefferson og Hjört Inga Halldórsson frá HK.