Eyjamaðurinn, Elís Þór Aðalsteinsson meiddist á hné í upphafi seinni hálfleiks í tapi U20 ára landsliðsins gegn Dönum í lokaleik þeirra í milliriðli Evrópumótsins.

Ágúst Jóhannsson þjálfari liðsins staðfesti í samtali við Handkastið í morgun að Elís yrði ekki með liðinu gegn Noregi í leiknum á morgun en Ísland mætir Noregi klukkan 9:00 í fyrramálið. Ísland leikur nú um 9.sætið á mótinu.

,,Elís meiddist í upphafi seinni hálfleiks á móti Dönum og hann hvílir leikinn á morgun og síðan sjáum við hvernig hlutirnir þróast. Hann er í góðum höndum hjá sjúkraþjálfara liðsins og það verður passað vel upp á hann. Við tökum síðan ákvörðun með framhaldið dag frá degi," sagði Ágúst Jóhannsson.

Aðspurður út í stöðuna á öðrum leikmönnum liðsins sagði Ágúst að allir aðrir leikmenn liðsins væru í fínu standi.

,,Við vorum að klára lyftingaræfingu og smá fund og erum að undirbúa okkur fyrir leikinn gegn Noregi.”