Íslenskir handboltamenn voru í eldlínunni víða um Evrópu í gær. Óðinn Þór Ríkharðsson og Thea Imani Sturludóttir fögnuðu sigrum með sínum liðum í Sviss og Rúmeníu á meðan Þorvaldur Örn Þorvaldsson og félagar í Wybrzeże Gdansk máttu þola óvænt eins marks tap á heimavelli í Póllandi.

Óðinn Þór Ríkharðsson og félagar í Kadetten Schaffhausen unnu góðan tveggja marka sigur á BSV Bern, 31-29, í svissnesku úrvalsdeildinni í dag.

Óðinn Þór var atkvæðamikill í liði Kadetten og lét vel að sér kveða í sóknarleik svissnesku meistaranna.

Kadetten heldur því áfram góðri byrjun sinni á tímabilinu en liðið hefur verið ráðandi afl í svissneskum handbolta undanfarin ár.

Þorvaldur Örn Þorvaldsson lék sinn fyrsta deildarleik fyrir PGE Wybrzeże Gdansk þegar liðið tók á móti Zepter KPR Legionowo í fyrstu umferð pólsku úrvalsdeildarinnar.

Leikurinn varð hins vegar ekki sú byrjun sem Gdansk hafði vonast eftir. Liðin voru jöfn í hálfleik, 17-17, og spennan hélst allt til loka en Legionowo hafði að lokum betur, 34-33. Úrslitin verða að teljast nokkuð óvænt enda, endaði Wybrzeże í 3.sæti deildarinnar á síðasta tímabili.

Þorvaldur skoraði eitt mark í sínum fyrsta opinbera deildarleik fyrir félagið. Mikołaj Czapliński var markahæstur Gdansk með níu mörk en Lukas Morkovsky skoraði sjö.

Þorvaldur gekk til liðs við Gdansk frá Val í sumar og samdi til ársins 2029. Hann varð Íslandsmeistari með Val á síðustu leiktíð áður en hann hélt út í atvinnumennsku.

Thea áberandi í fyrsta sigri Craiova

Thea Imani Sturludóttir og liðsfélagar hennar í SCM Craiova fögnuðu sínum fyrsta sigri á tímabilinu í rúmensku úrvalsdeildinni þegar liðið vann CSM Iași á útivelli, 27-24.

Heimakonur í Iași voru marki yfir í hálfleik, 13-12, en Craiova sneri leiknum sér í hag eftir hlé. Gestirnir skoruðu fimm mörk í röð eftir að hafa verið 13-12 undir og náðu í kjölfarið undirtökunum. Iași minnkaði muninn í eitt mark nokkrum sinnum og síðast í 24-23 þegar þrjár mínútur voru eftir, en Craiova var sterkara á lokasprettinum.

Thea var ein af lykilkonum Craiova í sigrinum. Hún og ungverska landsliðskonan Rebeka Pődör skoruðu samanlagt 15 af 27 mörkum liðsins, eða meira en helming marka Craiova en Thea skoraði sjálf sjö mörk í leiknum.

Sigurinn var sá fyrsti hjá Craiova á tímabilinu eftir 32-32 jafntefli gegn Slatina í 1. umferð. Thea gekk til liðs við Craiova frá Val í sumar eftir afar farsælan tíma á Hlíðarenda þar sem hún varð meðal annars þrívegis Íslandsmeistari og Evrópubikarmeistari.