Thea Imani Sturludóttir hefur farið vel af stað með SCM Craiova í rúmensku úrvalsdeildinni en íslenska landsliðskonan var valin í lið umferðarinnar eftir frammistöðu sína um helgina.

Thea Imani átti stóran þátt í 27-24 útisigri Craiova á CSM Iași og skoraði sjö mörk í leiknum. Þetta var fyrsti sigur Craiova á tímabilinu eftir 32-32 jafntefli gegn Slatina í fyrstu umferð.

Thea og ungverska landsliðskonan Rebeka Pődör voru burðarásar í sóknarleik Craiova og skoruðu samanlagt 15 af 27 mörkum liðsins. Pődör skoraði átta og Thea sjö. Frammistaða Theu vakti athygli og í kjölfarið var hún valin í lið umferðarinnar í rúmensku úrvalsdeildinni.

Thea gekk til liðs við Craiova frá Val í sumar eftir afar farsælan tíma á Hlíðarenda. Hún varð meðal annars þrívegis Íslandsmeistari með Val auk þess að verða Evrópubikarmeistari með liðinu.