Sander Sagosen, leikmaður Álaborgar, verður frá keppni næstu vikurnar vegna álagsmeiðsla í mjaðmagrind. Reiknað er með að endurhæfingin taki á bilinu sex til 14 vikur.

Sagosen varð fyrir meiðslunum í leik gegn Fredericia HK 2. september og lék þá áfram þrátt fyrir verki. Ítarlegar rannsóknir læknateymis Álaborgar hafa nú leitt í ljós umfang meiðslanna.

„Það er auðvitað pirrandi að það geti tekið allt frá sex til 14 vikur áður en ég verð tilbúinn aftur. Ég mun gera allt sem í mínu valdi stendur til að gera hléið eins stutt og mögulegt er,“ sagði Sagosen.

Fjarvera Norðmannsins er mikið áfall fyrir Álaborg sem á þétt leikjaprógramm fram undan í dönsku úrvalsdeildinni, bikarkeppninni og Meistaradeild Evrópu.