Mohamed El-Amin, fyrrverandi forseti egypska handknattleikssambandsins og áberandi persóna innan alþjóðlega handboltasamfélagsins, er látinn.

El-Amin gegndi mikilvægu hlutverki í uppbyggingu egypsks og afrísks handbolta undanfarinn áratug. Í mars árið 2021 var hann skipaður formaður bráðabirgðastjórnar egypska handknattleikssambandsins og tók aftur við sambærilegu hlutverki þegar ný stjórn var skipuð vorið 2022.

Hann lét einnig mikið að sér kveða utan handboltans en El-Amin var prófessor í íþróttaheilsufræði við Helwan-háskóla.

Hann nýtti fræðilegan bakgrunn sinn í starfi fyrir egypskan handbolta og lagði meðal annars mikla áherslu á líkamlegan undirbúning leikmanna, frammistöðugreiningu, læknisfræðilegan stuðning og uppbyggingu hæfileikafólks utan þeirra svæða þar sem handbolti hafði áður verið hvað sterkastur í Egyptalandi.

Egyptar héldu einnig nokkur stór alþjóðleg handboltamót á þeim tíma sem El-Amin var í forystu. Þar á meðal voru heimsmeistaramótin í hjólastólahandbolta árin 2022 og 2024 en egypska landsliðið komst í úrslitaleik mótsins í bæði skiptin.

El-Amin gegndi auk þess embætti varaforseta Arabíska handknattleikssambandsins frá árinu 2022.