Handknattleikssamband Íslands hefur sett nýjar reglur um myndbandsdómgæslu í íslenskum handbolta en reglurnar tóku gildi í gær, 28. september.

Myndbandsdómgæsla verður notuð í leikjum í Olís-deild karla og kvenna og hefst strax á fimmtudag þegar 4. og 5.umferðin í Olís-deildum karla og kvenna hefst.

,,Myndbandsdómgæslan er hugsuð sem hjálpartæki fyrir dómara þegar verulegur vafi leikur á réttri ákvörðun eða þegar dómararnir hafa ekki séð atvik nægilega vel. Aðeins á að breyta ákvörðun á grundvelli myndbands þegar upptakan gefur skýrar og ótvíræðar sjónrænar sannanir. Dómarar geta þar nýtt sér upptökur úr Spideo-kerfinu eða frá öðrum rétthöfum, svo lengi sem upptökurnar eru aðgengilegar við leikinn," segir í bréfi sem félögin í landinu fengu frá HSÍ.

Ellefu mismunandi tilvik

Í reglugerð HSÍ eru tilgreind ellefu tilvik þar sem heimilt er að grípa til myndbandsdómgæslu.

Geta leiðrétt annað brot sem kemur í ljós

Athygli vekur að dómarar geta einnig leiðrétt annað atvik sem kemur í ljós þegar þeir fara yfir upptökuna.

Komi í ljós við myndbandsskoðun að önnur röng ákvörðun hafi verið tekin eða brot átt sér stað án þess að dæmt hafi verið á það, eiga dómarar að leiðrétta ákvörðunina. Það á þó aðeins við um atvik sem gerðist á sama tíma og atvikið sem verið er að skoða eða strax á undan því.

Ekki verður þó hægt að fara langt aftur í leikinn til að endurskoða atvik. Að meginreglu þarf ákvörðun um myndbandsskoðun að koma í beinum tengslum við atvikið og ekki má grípa til hennar eftir að boltinn hefur skipt tvisvar um lið frá því að atvikið átti sér stað.

Leikmenn geta ekki krafist myndbandsskoðunar

Það verður ekki á valdi leikmanna eða þjálfara að krefjast þess að dómarar fari í skjáinn.

Samkvæmt reglunum geta leikmenn og liðsfulltrúar ekki krafist myndbandsdómgæslu. Krefjist leikmaður eða liðsfulltrúi þess með ágengum hætti eða sýni sjálfur VR-merkið gagnvart dómara getur það leitt til stighækkandi refsingar.

Þá teljast leikrænir tilburðir eða ýkt viðbrögð sem verða til þess að farið er í myndbandsskoðun til ódrengilegrar hegðunar og skal refsa fyrir slíkt samkvæmt leikreglum IHF.

Þegar myndbandsskoðun fer fram stöðva dómarar leiktímann og sýna sérstakt „VR“-merki. Að skoðun lokinni eiga þeir síðan að tilkynna lokaákvörðun sína með skýrum hætti til beggja liða og ritara- og tímavarðarborðs.