Norska handknattleikskonan Nora Mørk, leikmaður danska stórliðsins Team Esbjerg, var flutt á sjúkrahús eftir að hafa meiðst í sigurleik liðsins gegn Horsens í dönsku úrvalsdeildinni í kvöld.

Samkvæmt danska miðlinum TV 2 Sport lenti Mørk í árekstri við dómara þegar hún var á leið af leikvellinum í leikmannaskiptingu.

Mørk er talin hafa meiðst á ökkla í árekstrinum og þurfti hún aðstoð við að komast af leikvellinum.

Danski staðarmiðillinn MigogEsbjerg greinir frá því að Mørk hafi í kjölfarið verið flutt á sjúkrahús þar sem hún gekkst undir röntgenrannsókn.

Ekki liggur fyrir hversu alvarleg meiðslin eru eða hvort norska stórstjarnan verði frá keppni um einhvern tíma.

Team Esbjerg hefur enn ekki tjáð sig um meiðslin þrátt fyrir fyrirspurnir TV 2 Sport.