Haukar eru í efri styrkleikaflokki þegar dregið verður í 3. umferð Evrópubikars karla á morgun. Evrópska handknattleikssambandið (EHF) birti styrkleikaflokkana í dag.

Hafnarfjarðarliðið tryggði sér sæti í 3. umferðinni með tveimur öruggum sigrum gegn Handball Esch frá Lúxemborg um helgina. Haukar unnu einvígið samanlagt 72-45 og eru nú meðal 32 liða sem eftir standa í keppninni.

Athygli vekur að Haukar geta meðal annars dregist gegn færeyska liðinu H71, sem leikur í Hoyvík. Þá eru gríska stórliðið AEK, slóvenska liðið Gorenje Velenje og svissneska liðið Pfadi Winterthur meðal mögulegra mótherja Hauka.

Alls eru sextán lið í hvorum styrkleikaflokki og munu liðin í efri styrkleikaflokknum dragast gegn liðum úr þeim neðri.

Haukar eru í efri styrkleikaflokki ásamt meðal annars Alkaloid frá Norður-Makedóníu, þar sem Úlfar Páll Monsi Þórðarson leikur, norska liðinu Runar Sandefjord, Olympiacos frá Grikklandi og Vojvodina frá Serbíu. Haukar geta því ekki mætt Alkaloid í þessari umferð.

Dregið verður í höfuðstöðvum EHF í Vínarborg klukkan 10:00 að íslenskum tíma.

Fyrri leikir 3. umferðar fara fram helgina 21.–22. nóvember og síðari leikirnir viku síðar, 28.–29. nóvember. Sigurliðin sextán tryggja sér sæti í 16-liða úrslitum Evrópubikarsins sem fara fram í febrúar 2027.

Haukar hafa byrjað tímabilið af miklum krafti og unnið alla sjö leiki sína í Olís-deild karla auk þess að fara örugglega áfram í Evrópubikarnum. Þá vann liðið, Stjörnuna í 16-liða úrslitum Powerade-bikarsins.

Mögulegir mótherjar Hauka: Sloga Doboj, Gorica, Põlva Serviti, H71, AEK, Ramhat Hashron, Raimond Sassari, Dragunas Klaipeda, Lovćen Cetinje, Volendam, Potaissa Turda, Gorenje Velenje, Slovenj Gradec, Dubočica 54, Pfadi Winterthur og Považská Bystrica.