Hinn 18 ára gamli Gunnar Róbertsson getur skrifað nafn sitt í sögubækurnar í kvöld þegar hann og liðsfélagar hans í Val mæta Stjörnunni á útivelli í Olísdeildinni.

Gunnar hefur skorað 90 mörk í fyrstu sjö leikjum sínum á tímabilinu, eða tæplega 13 mörk að meðaltali í leik. Hann er því við það að rjúfa 100 marka múrinn og takist honum það í kvöld verður hann, eftir því sem heimildir bera með sér, fljótasti leikmaður sögunnar til að ná þeim áfanga í efstu deild karla.

Sögulega viðmiðið er frá árinu 1963 þegar Ingólfur Óskarsson fór á kostum með Fram. Ingólfur skoraði þá 122 mörk í aðeins tíu leikjum á tímabilinu, eða 12,2 mörk að meðaltali í leik.

Blaðaumfjöllun þess tíma sýnir að Ingólfur fór yfir 100 marka múrinn í níunda leik Fram. Fyrir þann leik hafði hann skorað 96 mörk en bætti við 16 mörkum gegn KR og var þar með kominn í 112 mörk eftir níu leiki.

Gunnar á því möguleika á að gera betur í kvöld en til þess þarf hann að skora að minnsta kosti tíu mörk. Nái hann 100 mörkum í sínum áttunda leik verður hann einum leik fljótari að þeim áfanga en Ingólfur var árið 1963.