Erlingur Richardsson og lærisveinar hans í GWD Minden eru úr leik í þýska bikarnum eftir 33–32 tap á útivelli gegn Eintracht Hagen í 16-liða úrslitum í kvöld. Hagen er þar með komið í átta liða úrslit í fyrsta sinn í sögu félagsins.

Hagen leiddi 15–11 í hálfleik og jók forskotið í sjö mörk, 19–12, í upphafi síðari hálfleiks. Minden vann sig aftur inn í leikinn og var þremur mörkum undir, 29–26, þegar rúmar tíu mínútur voru eftir. Lærisveinar Erlings minnkuðu muninn í eitt mark en nær komust þeir ekki fyrir lokaflautið.

Minden hafði áður unnið TuS Spenge 36–23 í fyrstu umferð og slegið úrvalsdeildarlið Bietigheim út með 34–32 sigri á útivelli. Það var hins vegar annað lið úr þýsku 2. deildinni sem batt enda á bikarævintýri Minden.

Um var að ræða fyrsta tap Minden undir stjórn Erlings sem tók við liðinu fyrir rúmlega mánuði síðan.