Haukur Þrastarson var markahæstur hjá Rhein-Neckar Löwen með níu mörk þegar liðið gerði 32–32 jafntefli við Lemgo í þýsku úrvalsdeildinni í kvöld. Þá fögnuðu Rúnar Sigtryggsson og lærisveinar hans í Wetzlar fyrsta deildarsigri tímabilsins.

Haukur skoraði eitt marka sinna úr vítakasti en Löwen var 15–14 yfir í hálfleik. Heimamenn þurftu að sætta sig við annað stigið eftir að Lemgo jafnaði metin skömmu fyrir leikslok. Samuel Zehnder var markahæstur gestanna með tíu mörk.

Wetzlar vann mikilvægan útisigur á Balingen, 26–23, í baráttunni við botn deildarinnar. Gestirnir leiddu 14–12 í hálfleik. Nýliðinn Miloš Kos lét strax til sín taka og var markahæstur Wetzlar með sjö mörk í sínum fyrsta leik fyrir félagið.

Andri Már Rúnarsson skoraði fjögur mörk, öll úr vítaköstum, þegar Erlangen vann Hamburg, 30–28. Hamburg komst í 12–6 en Erlangen svaraði með frábærum kafla og var komið yfir fyrir hálfleik, 14–13. Gestirnir jöfnuðu í 22–22 þegar tólf mínútur voru eftir en heimamenn reyndust sterkari á lokakaflanum. Marek Nissen og Noah Beyer voru markahæstir liðanna með sjö mörk hvor.

Fyrr um daginn vann Füchse Berlín topplið Kiel, 28–25, eftir að hafa verið 12–14 undir í hálfleik. Mathias Gidsel skoraði níu mörk fyrir Berlín.

Arnór Þór Gunnarsson og lærisveinar hans í Bergischer vann síðan sex marka sigur á Eisenach, 29–23. Jafnt var í hálfleik, 11–11, og enn í stöðunni 19–19 þegar um stundarfjórðungur var eftir. Þá tóku heimamenn völdin með 8–1 kafla og tryggðu sér stigin tvö. Felix Aellen skoraði níu mörk fyrir Eisenach.