Ásbjörn Friðriksson spilandi aðstoðarþjálfari FH í Olís-deild karla hefur sett skóna í hilluna eins og hann orðaði það í samtali við Handkastið.

Ásbjörn hefur legið undir feldi en orðrómur var um það undir lok síðasta tímabils að Ásbjörn væri að íhuga að leggja skóna á hilluna. Nú hefur hann staðfest að skórnir séu komnir í hilluna en ekki endilega á hilluna.

Ási gekk í raðir FH árið 2008 og hefur leikið með félaginu síðan þá, að undanskildu einu tímabili þar sem hann lék í Svíþjóð með Alingsås. Ásbjörn hefur tvívegis orðið Íslandsmeistari með FH, árið 2011 og 2024 auk þess sem hann varð bikarmeistari með FH árið 2019.

Ásbjörn var lykilmaður í liði FH á síðustu leiktíð og endaði sem næst markahæsti leikmaður liðsins með 138 mörk en einungis Jóhannes Berg Andrason skoraði fleiri mörk eða, 140 talsins.