Riðlakeppni Meistaradeildar kvenna lýkur um helgina og spennan gæti varla verið meiri. Í B-riðli eru fjögur lið enn í harðri baráttu um tvö bein sæti í átta liða úrslitum og úrslitin ráðast í beinum toppslag. Á sama tíma ræðst hvaða lið fylgja áfram í umspil – og fyrir sum er þetta síðasti séns.

Í A-riðli eru efstu sætin þegar tryggð, en þar er enn spenna um lokasætið í útsláttarkeppninni. Úrslitahelgi er framundan þar sem hvert mark og hvert stig getur ráðið úrslitum. Helgin verður því einn stór úrslitaleikur þar sem að stöðurnar geta breyst frá mínútu til mínútu.

Leikir helgarinnar

B-riðill

Odense - FTC | Laugardagur 21.febrúar kl 17:00
Þetta er hreinn úrslitaleikur um möguleika á sæti í átta liða úrslitum. Odense getur tryggt sér beint sæti með sigri – eða jafntefli ef CSM misstígur sig. FTC þarf hins vegar sigur og að CSM vinni ekki.
Odense hefur verið með eina öflugustu sókn keppninnar og skorað yfir 33 mörk að meðaltali í leik, en FTC byggir árangur sinn á sterkri vörn og skipulögðum leik. Búast má við líkamlegum og taktískum leik þar sem smáatriðin ráða úrslitum.

CSM Búkarestí - Ikast | Laugardagur 21.febrúar kl 17:00
CSM er á sjö leikja sigurgöngu og hefur heldur betur fundið taktinn á lokasprettinum. Sigur gæti dugað til að fá sæti beint í átta liða úrslitum – en aðeins ef Odense tapar stigum.
Ikast er þegar öruggt í umspil, en getur með góðum úrslitum bætt stöðu sína. Liðið hefur sýnt að það getur strítt toppliðunum og verður hættulegt með hraðan sóknarleik og sterkar skyttur.

Krim - Brest | Laugardagur 21.febrúar kl 17:00
Brest er í kjörstöðu og kemst beint áfram með sigri eða jafntefli. Tap gæti þó sett liðið í hættu ef önnur úrslit falla gegn þeim.
Auk baráttunnar um stig beinist athyglin að Önu Gros, sem er aðeins sjö mörkum frá því að ná 1.000 mörkum í keppninni. Brest treystir á hraðan og árangursríkan sóknarleik, á meðan Krim – sem er úr leik – vill enda tímabilið með góðum leik fyrir stuðningsfólkið sitt.

Sola - Podravka | Laugardagur 21.febrúar kl 17:00
Sola leikur sinn síðasta leik í sinni fyrstu Meistaradeildarþátttöku og vill kveðja með sigri. Podravka hefur tryggt sér umspilssæti og mætir án pressu, en sigur myndi styrkja sjálfstraustið fyrir útsláttarkeppnina.

A-riðill

Storhamar - Bistrita | Sunnudagur 22.febrúar kl 13:00
Storhamar á enn möguleika á að komast í umspilið en þarf sigur – og um leið að Dortmund tapi gegn Györ. Liðið braut átta leikja taphrinu í síðustu umferð og fer því inn í leikinn með aukið sjálfstraust. Bistrita er öruggt í fjórða sæti.

DVSC - Buducnost | Sunnudagur 22.febrúar kl 13:00
DVSC hefur tryggt sér umspilssæti og getur ekki breytt stöðu sinni. Buducnost er úr leik og leikur sinn síðasta leik í keppninni. Líklegt er að bæði lið nýti breiddina og dreifi álaginu.

Metz - Esbjerg | Sunnudagur 22.febrúar kl 15:00
Metz er þegar komið í átta liða úrslit en getur enn unnið riðilinn ef Györ misstígur sig. Esbjerg tryggði sér þriðja sætið en er í miklu formi eftir sögulegan sigur á Györ. Þetta gæti orðið einn af skemmtilegri leikjum umferðarinnar.

Györ - Dortmund | Sunnudagur 22.febrúar kl 15:00
Györ vinnur riðilinn með sigri. Dortmund þarf aðeins eitt stig til að tryggja síðasta umspilssætið – annars gæti Storhamar stolið sætinu. Þrátt fyrir að hafa þegar tryggt sér átta liða sæti mun Györ vilja svara fyrir tap í síðustu umferð.