Riðlakeppni Meistaradeildar kvenna lauk um helgina með úrslitaleikjum um sæti bæði í átta liða úrslitum og umspili. Í B-riðli tryggðu Brest og CSM sér bein sæti áfram þar sem Ana Gros náði sögulegum áfanga þegar hún skoraði sitt þúsundasta mark, en í A-riðli fékk Borussia Dortmund síðasta umspilssætið á meðan Storhamar féll úr leik.

Úrslit helgarinnar

A-riðill

Györ - Dortmund 39-28 (24-17)
Markahæstar: Bruna de Paula 8 (Györ) – Guro Nestaker 6 (Dortmund)
Dortmund hélt í við heimakonur fyrstu mínúturnar, en um miðjan fyrri hálfleik tók Györ yfir með 3:0 kafla og byggði upp sjö marka forskot í hálfleik, þar sem Bruna de Paula var óstöðvandi í sóknarleik ungverska liðsins.
Í síðari hálfleik jók Györ muninn enn frekar, meðal annars með sterkri markvörslu frá Zsófi Szemerey. Þrátt fyrir stórt tap slapp Dortmund í umspil þar sem úrslitin í öðrum leikjum féllu þeim í hag.

Metz - Esbjerg 40-26 (16-12)
Markahæstar: Sarah Bouktit 9 (Metz) – Henny Reistad 5 (Esbjerg)
Leikurinn var jafn fyrstu fimmtán mínúturnar, en Metz náði smám saman tökum á honum með betri nýtingu úr færunum. Sarah Bouktit og Lylou Borg leiddu sóknarleikinn og heimaliðið var fjórum mörkum yfir í hálfleik.
Í seinni hálfleik hrundi leikur Esbjerg. Mistök í sókn og sterkur varnarleikur og góð markvarsla Metz gerðu það að verkum að munurinn jókst hratt. Franska liðið skoraði 40 mörk og batt enda á átta leikja taplausa hrinu danska liðsins.

DVSC - Buducnost 32-30 (16-16)
Markahæstar: Alicia Toublanc 5 (DVSC) – Itana Grbic 9 (Buducnost)
Skemmtilegur og opinn leikur þar sem DVSC byrjaði betur og komst í 7:2. Buducnost svaraði hins vegar vel og jafnaði fyrir hálfleik.
Síðari hálfleikur var jafn allan tímann og Buducnost jafnaði síðast í 30:30 tveimur mínútum fyrir leikslok. Þá reyndust heimakonur sterkari og skoruðu tvö síðustu mörkin til að tryggja sigur.

Storhamar - Gloria Bistrita 30-34 (12-14)
Markahæstar: Anniken Obaidli 8 (Storhamar) – Larissa Nüsser 7, Angela Stoica 7 (Bistrita)
Storhamar byrjaði vel og náði þriggja marka forskoti um miðjan fyrri hálfleik. Þá kom vendipunkturinn þegar Bistrita skoraði fimm mörk í röð og sneri leiknum sér í vil.
Í síðari hálfleik héldu gestirnir frumkvæðinu og náðu mest sjö marka forskoti. Storhamar minnkaði muninn undir lokin, en tapið þýddi að liðið féll úr leik.

B-riðill

Odense - FTC 28-30 (15-17)
Markahæstar: Elma Halilcevic 6, Mie Højlund 6 (Odense) – Petra Simon 8 (FTC)
Leikurinn var jafn og spennandi frá fyrstu mínútu, þar sem hvorugt liðið náði meira en eins marks forskoti framan af. Undir lok fyrri hálfleiks nýtti FTC sér tæknimistök heimakvenna og skoraði þrjú mörk í röð til að ná tveggja marka forskoti í leikhlé.
Í seinni hálfleik héldu gestirnir frumkvæðinu, en Odense neitaði að gefast upp. Með góðum kafla á lokamínútunum náðu þær bæði að jafna og komast yfir í stöðunni 28:27. Þá reyndi á taugar liðanna. FTC var skarpara á lokakaflanum, vann boltann á mikilvægum augnablikum og tryggði sér sigur – og þriðja sætið í riðlinum. Odense endaði í fjórða sæti og fer í umspil.

Krim - Brest 25-37 (9-18)
Markahæstar: Tamara Mavsar 8 (Krim) – Ana Gros 7 (Brest)
Brest sýndi strax yfirburði og náðu afgerandi forskoti með 9:1 kafla um miðjan fyrri hálfleik. Sterk markvarsla Floriane André og hraðar sóknir gerðu það að verkum að leikurinn var nánast ráðinn í hálfleik.
Í síðari hálfleik stjórnaði Brest hraðanum og hélt öruggri forystu. Stærsta augnablikið kom þó þegar Ana Gros skoraði sitt sjöunda mark og fór yfir 1.000 mörk í Meistaradeildinni, aðeins fimmti leikmaðurinn í sögunni til að ná þeim áfanga.

CSM Búkaresti - Ikast 33-24 (15-7)
Markahæstar: Valeriia Maslova 7, Elizabeth Omoregie 5 (CSM) – Julie Scaglione 7 (Ikast)
Leikurinn byrjaði rólega, en um miðjan fyrri hálfleik tók CSM öll völd á vellinum. Sterk vörn og frábær frammistaða Gabrielu Moreschi í markinu (59% varin skot) gerðu það að verkum að Ikast skoraði aðeins fimm mörk á fyrstu 16 mínútunum.
Níu marka forskot í hálfleik reyndist of stórt. Ikast bætti sóknarleikinn og minnkaði muninn lítillega, en CSM hélt ró sinni og vann öruggan sigur. Þetta var áttundi sigur liðsins í röð og tryggði þeim sæti í átta liða úrslitum.

Sola - Podravka 33-24 (17-12)
Markahæstar: Frida Brandbu 6 (Sola) – Katja Vukovic 4 (Podravka)
Podravka byrjaði betur, en þegar Sola komst yfir um miðjan fyrri hálfleik snerist leikurinn. Sterk vörn og hraðaupphlaup skiluðu fimm marka forskoti í hálfleik.
Í síðari hálfleik dró þreyta úr Podravka, sem var með fámennan bekk vegna meiðsla. Sola jók muninn fljótt í níu mörk og sigldi öruggum sigri í höfn – og lauk sínu fyrsta tímabili í Meistaradeildinni á jákvæðum nótum.

Niðurstaðan eftir riðlakeppnina
Beint í átta liða úrslit: Györ, Metz, Brest, CSM
Í umspil: Esbjerg, Bistrita, DVSC, Dortmund, FTC, Odense, Ikast, Podravka
Úr leik: Storhamar, Buducnost, Krim, Sola

Umspil

Podravka - Esbjerg
Dortmund - FTC
Ikast - Gloria Bistrita
DVSC - Odense

Leikirnir í umspilinu verða leiknir 21-22.mars og 28-29.mars