Lokaleikurinn í 20.umferð Olís-deildar karla fer fram í Heklu-höllinni í kvöld þegar Stjarnan og KA mætast klukkan 18:30.

Stjarnan er í 11.sæti deildarinnar með 10 stig á meðan KA er með 24 stig um miðja deild. Rætt var um leiktímann á þessum leik í síðasta þætti Handkastsins þar sem 21. umferðin fer síðan strax fram á mánudagskvöld áður en lokaumferðin fer síðan öll fram á fimmtudagskvöldið í næstu viku.

Stjarnan og KA fá því einungis tvo daga til að undirbúa sig fyrir leiki sína í 21.umferðinni. Stjarnan mætir þar ÍR og KA fær FH í heimsókn.

,,Eftir þessa umferð er spilað aftur á mánudagskvöld. Stjarnan og KA eru að fara spila á föstudag og strax aftur á mánudag. Breiddin á Stjörnuliðinu fyrir leik gegn ÍR, ég skil ekki að Stjarnan hafi samþykkt þetta. Afhverju í andskotanum er þessi leikur á föstudaginn? Segjum að Tandri eða Ísak Logi séu eitthvað að reyna koma inn, þá eru þeir ekki að fara spila föstudag og mánudag. Ég bara hafði ekki pælt í þessu fyrr en núna,” sagði Arnar Daði Arnarsson sem virtist vera í áfalli að bæði Stjarnan og KA hafi viljað spila á föstudagskvöld og leika síðan aftur þremur dögum síðar.

,,Þetta er eiginlega jafn skrítið og að Þór-Haukar sé á miðvikudaginn,” bætti Ásgeir Gunnarsson við en hann var gestur í þættinum ásamt Sigurjóni Friðbirni Björnssyni.

Deildarkeppnin í Olís-deild karla lýkur 12. mars en þá fara þrjú lið í sumarfrí. Átta lið fara í 8-liða úrslit og 11.sætið fer í umspil um laust sæti í Olís-deildinni á næstu leiktíð.

,,Ég bara skil þetta ekki. Nú var ég í handbolta í meistaraflokki og ég man ekki eftir því að tímabilið hafi verið búið í mars. Er mig bara að misminna?" velti Sigurjón Friðbjörn fyrir sér.