Fyrri leikir umspils Meistaradeildar kvenna buðu upp á skýra niðurstöðu: heimavöllurinn skilaði engu liði sigri. Þegar upp var staðið höfðu Odense, Esbjerg, FTC og Gloria Bistrita öll tryggt sér útisigra og þar með sterka stöðu fyrir seinni leikina í baráttunni um sæti í átta liða úrslitum.

Dönsku liðin settu tóninn strax á laugardeginum þegar Odense vann öruggan 37:32 sigur gegn DVSC Schaeffler í Ungverjalandi og Esbjerg valtaði yfir Podravka, 37:26, í Króatíu. Á sunnudeginum fylgdu svo FTC og Gloria Bistrita því eftir; FTC vann sterkan 31:25 sigur í Dortmund, á meðan Gloria snéri við erfiðri stöðu og vann dramatískan 35:34 sigur á Ikast í Danmörku.

Úrslit helgarinnar

DVSC - Odense 32-37 (13-18)
Markahæstar: Ines Ivancok-Soltic 5/5 (DVSC) – Helene Fauske 8/10 (Odense)
Odense sýndi strax í upphafi leiks að liðið mætti með skýrt markmið: að ná tökum á einvíginu strax í fyrri leiknum. Upphafið var þó fremur varfærnislegt og markverðirnir, Jessica Ryde og Yara Ten Holte, stálu senunni á fyrstu mínútunum. Staðan var aðeins 1:1 eftir sex mínútur, en þegar sóknarleikurinn fór að flæða voru það gestirnir sem fundu taktinn fyrst.
Odense komst í 5:2 og hélt svo áfram að sækja á með miklum hraða og góðri nýtingu. Ines Ivancok-Soltic hélt heimakonum inni í leiknum um tíma, en varnarleikur DVSC riðlaðist of oft þegar leið á fyrri hálfleikinn. Danska liðið nýtti sér veikleikana af mikilli grimmd og náði fimm marka forskoti undir lok hálfleiksins.
Í seinni hálfleik hélt leikmyndin áfram á svipuðum nótum. Odense var með aðeins tíu útileikmenn en það sást lítið á frammistöðunni. Helene Fauske, Ragnhild Valle Dahl og Thale Rushfeldt Deila stýrðu sóknarleiknum af öryggi, á meðan Ten Holte hélt áfram að verja stórkostlega og endaði með 21 skot varið og tæplega 40 prósenta markvörslu. DVSC náði aldrei almennilega að setja Odense undir næga pressu, og það að Alicia Toublanc þurfti að bíða fram á 43. mínútu eftir fyrsta marki sínu sagði það sitt um erfiðan dag hjá heimaliðinu.
DVSC saxaði muninn aðeins niður undir lokin þegar smá slaki kom í leik Odense, en fimm marka sigur var engu að síður afar sannfærandi niðurstaða fyrir danska liðið, sem er nú með annan fótinn í átta liða úrslitum.

Podravka - Esbjerg 26-37 (13-19)
Markahæstar: Matea Pletikosić 6/8 (Podravka) – Henny Reistad 11/13 (Esbjerg)
Esbjerg gerði nánast út um einvígið í fyrri leiknum. Podravka byrjaði af krafti á heimavelli og komst snemma í 4:3, en það reyndist skammgóður vermir. Um leið og danska liðið herti varnarleikinn og fór að nýta mistök króatíska liðsins fór að síga á ógæfuhliðina fyrir heimakonur.
Esbjerg komst í 10:7 og byggði síðan jafnt og þétt ofan á það forskot. Podravka lenti í vandræðum með að halda aga í sóknarleiknum, tapaði boltum á slæmum augnablikum og þegar sóknirnar gengu upp beið Anna Kristensen í markinu með mikilvægar vörslur. Þegar leið á fyrri hálfleikinn var sex marka munur orðinn staðreynd og Esbjerg hafði náð algjörri stjórn á hraða og flæði leiksins.
Snemma í seinni hálfleik jókst forskotið í níu mörk og þar virtist leikurinn nánast búinn. Podravka náði að blása aðeins lífi í vonir sínar þegar Matea Pletikosić steig upp og minnkaði muninn í 24:28 þegar tíu mínútur voru eftir, en lengra komst króatíska liðið ekki. Þá sýndi Esbjerg gæði sín, ró og breidd í hópnum, lokaði leiknum af miklu öryggi og skoraði aftur af krafti á lokakaflanum.
Henny Reistad var enn á ný í aðalhlutverki með 11 mörk, og alls komust 13 af 14 útileikmönnum Esbjerg á blað. Ellefu marka útisigur er einfaldlega yfirlýsing, og það þyrfti nánast kraftaverk til að Podravka sneri þessu einvígi sér í hag í seinni leiknum.

Dortmund - FTC 25-31 (10-13)
Markahæstar: Lara Egeling 8/12 (Dortmund) – Petra Simon 8/14 (FTC)
FTC fékk mun harðari mótspyrnu en lokatölurnar gætu gefið til kynna. Dortmund var vel inni í leiknum lengst af, var sterkt varnarlega og með Melindu Szikora öfluga í markinu gekk FTC illa að ná almennilegu forskoti. Þegar staðan var 9:9 á 21. mínútu var ljóst að ungverska liðið þyrfti að finna nýjar lausnir, og leikhlé Jesper Jensen reyndist afar mikilvægt.
Eftir það fór sóknarleikur FTC að smella betur. Petra Simon steig upp sem leikstjórnandi og markaskorari, og með betri ákvörðunum á síðustu mínútum fyrri hálfleiks náðu gestirnir loks að skapa sér þriggja marka forystu. Blanka Böde-Bíró lagði þar sitt af mörkum með sterkri markvörslu og tryggði að Dortmund kæmist ekki aftur inn í leikinn fyrir hlé.
FTC virtist svo ætla að slíta sig endanlega frá heimaliðinu í byrjun seinni hálfleiks þegar liðið komst í 18:14. Dortmund neitaði þó að brotna. Með Kelly Vollebregt og Löru Egeling fremstar í flokki jafnaði þýska liðið leikinn í 46. mínútu og þá virtist allt geta gerst.
En á lokakaflanum vó reynsla og yfirvegun FTC þyngra. Dortmund tapaði of mörgum boltum í sókninni, og FTC nýtti það grimmt. Innkoma Lauru Glauser í markið hjá ungverska liðinu var einnig afar mikilvæg, því hún kom inn með lykilvörslur þegar leikurinn var í járnum. Á síðustu tíu mínútunum breyttist jafn leikur í sex marka útisigur fyrir FTC, sem er nú komið í mjög þægilega stöðu fyrir seinni leikinn á heimavelli.

Ikast - Gloria Bistrita 34-35 (21-16)
Markahæstar: Stine Skogrand 10/12 (Ikast) – Danila So Delgado 11/16 (Gloria Bistrita)
Langdramatískasti leikur helgarinnar fór fram í Ikast, þar sem Gloria Bistrita náði að snúa við leik sem virtist um tíma stefna örugglega heimaliðinu í hag. Fyrri hálfleikurinn var opinn, hraður og afar skemmtilegur, með miklum sveiflum. Gloria náði fyrst tveggja marka forskoti í 7:5, en síðan missti rúmenska liðið flæðið í sókninni og Ikast refsaði.
Danska liðið setti þá í gang 4:0 kafla og komst í 12:8, þar sem Stine Skogrand fór hreinlega á kostum. Hún skoraði tíu mörk í leiknum og var helsta driffjöður Ikast, sem nýtti sér einnig illa heppnaðar sóknir Gloria þegar gestirnir tóku markvörðinn út af. Í hálfleik munaði fimm mörkum, 21:16, og Ikast leit út fyrir að vera með tögl og hagldir.
En Gloria gafst ekki upp. Smátt og smátt vann liðið sig aftur inn í leikinn, fyrst með 3:0 kafla og síðan með sterkari varnarleik og stórum vörslum frá Renötu de Arruda. Þegar tíu mínútur voru eftir var staðan orðin 30:30 og allt opið á ný.
Á þeim tímapunkti fékk Gloria svo enn eitt áfallið þegar Danila So Delgado, markahæsti leikmaður liðsins, fékk rautt spjald. Það hefði getað fellt liðið, en varð þvert á móti kveikjan að enn meiri seiglu. Gloria komst yfir 34:33 á 56. mínútu, í fyrsta sinn síðan snemma í leiknum, og á lokamínútunum missti Ikast aðeins tökin. Með aðeins tíu útileikmenn á skýrslu fór að draga af heimaliðinu, sem skoraði aðeins einu sinni í síðustu fimm sóknum sínum.
Gloria hélt hins vegar haus, de Arruda lokaði markinu þegar mest reyndi á og rúmenska liðið fagnaði eins marks sigri eftir magnaða endurkomu. Þetta einvígi er þó langt frá því að vera búið, enda er aðeins eitt mark á milli liðanna fyrir seinni leikinn í Rúmeníu.