Íslendingaliðið Blomberg-Lippe sem landsliðskonurnar Elín Rósa Magnúsdóttir, Díana Dögg Magnúsdóttir og Andrea Jacobsen leika með tryggði sér deildarmeistaratitilinn í þýsku úrvalsdeildinni í dag.

Ljóst var fyrir leik gegn Borussia Dortmund í dag að Blomberg-Lippe þyrfti sigur til þess að enda í efsta sæti deildarinnar. Liðið sigraði leikinn 33:31 í algjörum toppslag og fagna þær því deildarmeistaratitli í dag.

Eyjamærin Díana Dögg Magnúsdóttir innsiglaði sigur liðsins þegar hún skoraði lokamark leiksins. Díana Dögg skoraði sex mörk í leiknum í dag og Elín Rósa Magnúsdóttir skoraði eitt mark og gaf þrjár stoðsendingar. Elín Rósa er uppalin í Fylki en spilaði lengi vel með Val áður en hún fór út til Þýskalands. Andrea Jacobsen sem alin er upp í Fjölni komst ekki á blað en átti 3 stoðsendingar ásamt því að standa pliktina vel í vörn liðsins.

Úrslitakeppnin í þýska kvennaboltanum er núna handan við hornið þar sem fjögur efstu lið deildarinnar fara áfram. Vinna þarf tvo leiki í undanúrslitum og í úrslitum til að standa uppi sem Þýskalandsmeistari. 

Handkastið óskar Elín Rósu, Díönu Dögg og Andreu innilega til hamingju með deildarmeistaratitilinn.