Íslands- og deildarmeistarinn, Þorvaldur Örn Þorvaldsson hefur samið við pólska félagið GE Wybrzeże Gdansk og gengur hann til liðs við félagið í sumar. Þetta staðfesti hann í samtali við Handkastið.

Þorvaldur fór til Póllands í byrjun árs á reynslu hjá félaginu og fékk í kjölfarið samningstilboð frá pólska liðinu en liðið endaði í 4.sæti pólsku úrvalsdeildarinnar með 48 stig, stigi á eftir 3.sætinu.

Þorvaldur varð í gær Íslandsmeistari með Val eftir sigur gegn FH 27-26 í oddaleik úrslitaeinvígisins. Skoraði Þorvaldur þrjú mörk í leiknum og lét til sín taka í vörninni.

Þorvaldur sem er fæddur árið 2004 er uppalinn hjá Val og hefur verið í stóru hlutverki hjá liðinu undanfarin tvö tímabil.

Greinilegt er að miklar breytingar verða á liði Vals á milli tímabila en Magnús Óli Magnússon, Róbert Aron Hostert og Agnar Smári Jónsson eru allir að renna út af samningum hjá félaginu.