Magnús Stefánsson þjálfari ÍBV var stoltur af sínu liði þrátt fyrir tap gegn Val í fjórða leik liðanna í úrslitaeinvígi Íslandsmótsins en Valur tryggði sér Íslandsmeistaratitilinn með sigrinum í kvöld.

,,Ég vil bara byrja að óska Val til hamingju og þakka þeim fyrir seríuna. Þær hafa verið frábærar í vetur og voru frábærar í þessu einvígi. Þær eru verðugir handhafar þessa titils. Ég er hinsvegar alveg ólýsanlega stoltur af mínum stelpum," sagði Magnús í viðtali við Ingvar Örn Ákason í opinni dagskrá í Sjónvarpi Símans.

,,Ég er ótrúlega þakklátur fyrir stuðninginn og gerir þetta að sennilega skemmtilegasta heimavelli landsins, hlutlaust mat."

,,Auðvitað er þetta svekkjandi og sárt en það er samt mikið stolt á bakvið þetta.”

Magnús segir að framtíðin sé björt í Eyjum.

,,Við erum með ungar og mjög frambærilegar stelpur í bland við þessar eldri og reynslu meiri. Þetta er eitthvað sem mun vera uppskriftin af okkar leið næstu árin.”